Астана. 29 қазан. BM.KZ – Ямайкада «Мелисса» дауылына дайындық кезінде үш адам қаза тапты. Дауыл салдарынан аралда өмірге қауіп төндіретін жел тұрып, жаңбыр жауады, деп хабарлайды Anewz.
АҚШ-тың Ұлттық дауыл орталығының мәліметінше, «Мелисса» максималды желмен Ямайкаға қарай 281 км/сағ жылдамдықпен жылжып келеді. Дауыл түнде солтүстікке қарай жақындап, сейсенбіде солтүстік-шығысқа бағытталады деп болжанды.
Ямайка премьер-министрі Эндрю Холнесс осал аймақтардан халықты эвакуациялауға бұйрық берді. Ол тұрғындарды үйде болуға және эвакуация туралы бұйрықты орындауға шақырды.
— Мен әрбір ямайкалықты дайындалуға, дауыл кезінде үйде болуға және эвакуация туралы бұйрықтарды орындауға шақырамын… Біз бұл дауылға қарсы тұрамыз және барлығын қалпына келтіреміз, — деп жазды Холнесс.
Сондай-ақ дауыл Гаити мен Доминикан Республикасында да 4 адамның өмірін қиды, онда толассыз жауған нөсер су тасқыны мен көшкінге ұласты.