Астана. 8 қараша. BM.KZ – Стамбұлдың Бас прокуратурасы Израиль премьер-министрі Биньямин Нетаньяхуға «геноцид» жасады деген айыппен қамауға алу туралы ордер берді. Бұл туралы DW жазды.
Сонымен қатар, Израиль үкіметінің тағы 36 өкіліне, сондай-ақ, бірқатар саяси және әскери тұлғаларға да ордер шығарылған. Бұл туралы түрік прокуратурасы қараша айының 7-сі, жұма күні кешке «X» әлеуметтік желісінде хабарлады.
Олардың қатарында Израильдің қорғаныс министрі Исраэль Кац, ұлттық қауіпсіздік министрі және ультраоңшыл «Оцма Йехудит» («Еврей күші») партиясының жетекшісі Итамар Бен-Гвир, сондай-ақ Израиль қорғаныс армиясының Бас штабының бастығы, генерал-лейтенант Эяль Замир бар.
«Израиль Газа секторында жүйелі түрде жасап отырған геноцид пен адамзатқа қарсы қылмыстардың салдарынан әйелдер мен балаларды қоса алғанда, мыңдаған адам қаза тапты, мыңдағаны жараланды, ал тұрғын аймақтар қирады», – деп жазылған прокуратура мәлімдемесінде.
Құжатта, сондай-ақ, Израильдің «Бостандық флотилиясына» қатысты әрекеттері де айтылған. Биыл қазанда бұл гуманитарлық көмекті Газаға жеткізбек болған кемелерді Израиль билігі тағы да тоқтатқан.