Астана. 10 желтоқсан. BM.KZ — Украина президенті Владимир Зеленский сайлаудың қауіпсіз жағдайда өтуі қамтамасыз етілсе, алдағы екі-үш ай ішінде президенттік сайлау өткізуге дайын екенін айтты, деп хабарлайды BBC.
Ақ үй президенті Дональд Трамп Politico басылымына берген сұхбатында Украинада жаңа президент сайлауын өткізуді қолдайтынын айтты.
Америкалық көшбасшы Украинада жалғасып жатқан қақтығысқа қарамастан, жаңа президент сайлауын өткізетін уақыт келгенін мәлімдеді. Оның пікірінше, сайлау өткізуден бас тарту демократия қағидаттарына қайшы.
Трамп Украина президенті Владимир Зеленскийдің тағы да жеңіске жету мүмкіндігі бар екенін атап өтті.
— Кімнің жеңетінін білмеймін. Бірақ оларда сайлау көптен бері болған жоқ. Білесіздер ме, олар демократия туралы айтады, бірақ қандай да бір сәтте ол енді демократия емес, — деді Ақ үй басшысы.
Украинадағы келесі президент сайлауы кесте бойынша 2024 жылы өтуі тиіс еді, алайда Ресей мен Украина арасындағы қақтығысқа байланысты кейінге қалдырылды.
Украина басшысы бұл мәселеге қатысты депутаттар мен халықаралық серіктестерден ұсыныс күтетінін, содан кейін сайлау өткізуге дайын болатынын жеткізді.
— Бұл мәселені бүгінде АҚШ президенті көтеріп отырғандықтан, мен қысқаша жауап беремін, мен сайлауға дайынмын. Оның үстіне, қазір АҚШ-тан, қажет болса еуропалық әріптестермен бірлесіп, сайлау өткізу үшін қауіпсіздікті қамтамасыз етуге көмектесуін сұраймын. Егер қауіпсіздік қамтамасыз етілсе, онда алдағы 60–90 күн ішінде Украина сайлау өткізуге дайын болады, — деді Владимир Зеленский.
Сондай-ақ ол бейбітшілік жоспарына қатысты үш құжаттың мазмұнын ашып айтты.
— 20 тармақтан тұратын негіздемелік құжат бар. Ол үнемі өзгеріп отырады, бұл қалыпты жағдай. Бұл Украина, Еуропа және бүкіл әлемнің мүдделеріне сай болуы тиіс тірі құрылым, — деді Украина президенті.
Оның айтуынша, екінші құжат қауіпсіздік кепілдіктеріне арналған, ал үшінші құжат Украинаны қалпына келтіру мәселелерін қамтиды.