Астана. 13 желтоқсан. BM.KZ — Қарағанды облысы Шет ауданына қарасты Мойынты станциясындағы кафеде болған 300 шаршы метр аумақтағы өрт толықтай сөндірілді.
Төтенше жағдайлар министрлігінің алдын ала мәліметінше, газ баллонының жарылуына газбен жабдықтау жүйелерін, соның ішінде тұрмыстық газ баллондарын қауіпсіз пайдалану талаптарының бұзылуы себеп болған.
Оқиға бір қабатты ғимаратта орын алған. Жарылыс салдарынан шамамен 200 шаршы метр аумақта жабын конструкциялары құлап, қазір құтқарушылар үйінділерді аршу жұмыстарын жүргізіп жатыр.
Нақты деректерге сәйкес, қайғылы оқиға салдарынан екі адам қаза тауып, он бір адам аудандық ауруханаға медициналық көмек көрсету үшін жеткізілді.
Құтқару қызметі зақымданған құрылымдарды тексеріп, қайта өртенудің алдын алу шараларын қабылдап жатыр. Оқиғаның барлық мән-жайы анықталмақ.