Астана. 13 желтоқсан. BM.KZ — Еуропалық футбол жанкүйерлері ұйымы (Football Supporters Europe, FSE) Халықаралық футбол федерациясын (FIFA) 2026 жылғы әлем чемпионатына билеттер сатуды дереу тоқтатуға шақырды. Ұйым өкілдерінің айтуынша, белгіленген бағалар жанкүйерлерді турнирге бару мүмкіндігінен іс жүзінде айырып отыр, деп хабарлайды Reuters.
Әңгіме ұлттық қауымдастықтар арқылы ресми фан-клубтар мен адалдық бағдарламаларына қатысушылар арасында таратылатын билеттер турасында. FSE мәлімдемесінде мұндай билеттердің бағасы тым шарықтап кеткені және қарапайым жанкүйерлер үшін қолжетімсіз екені айтылған.
Ұйым дерегінше, өз құрамасының ойындарын топтық кезеңдегі алғашқы матчтан бастап финалға дейін көргісі келетін жанкүйер кемінде 6900 доллар (шамамен 3,59 млн теңге) төлеуге мәжбүр болады. Бұл 2022 жылғы Катардағы әлем чемпионатымен салыстырғанда шамамен бес есе қымбат.
FSE атқарушы директоры Ронан Эвейн Reuters-ке берген сұхбатында жанкүйерлерді билет бағасының шектен тыс жоғары болуы қатты таңғалдырғанын және FIFA турнирден барынша көп пайда табуға тырысып отырғанын айтқан. Оның сөзінше, финалдық матчқа билеттердің бағасы 4000 долларға (шамамен 2,08 млн теңге) дейін жетуі мүмкін.
«Төрт адамнан тұратын отбасы үшін әлем чемпионатына бару шамамен 30 мың долларды (шамамен 15,6 млн теңге) құрайды. Мұндай шығынды футбол жанкүйерлерінің басым бөлігі көтере алмайды. Тіпті Еуропада да», – дейді Ронан Эвейн.
Football Supporters Europe ұйымы FIFA-ны ұлттық қауымдастықтар квотасы бойынша билет сатуды тоқтатуға және футбол федерацияларымен, жанкүйерлер ұйымдарымен әрі өзге де тараптармен кеңес жүргізуге шақырды. Ұйым өкілдерінің пікірінше, қабылданатын шешім әлем чемпионатының дәстүрін, әмбебаптығын және мәдени маңызын құрметтеуге тиіс.