Астана. 18 қаңтар. BM.KZ — Қазақстанның екінші ракеткасы, әлемдік рейтингте 105-орында тұрған Юлия Путинцева Аустралия ашық чемпионатындағы жарысын сенімді жеңіспен бастады.
Алғашқы айналымда қазақстандық теннисші әлемнің 59-ракеткасы, Бразилия өкілі Беатрис Хаддад Майямен кездесті. Қарсыласы фаворит саналғанымен, Путинцева мінез көрсетіп, тартысты матчта жеңіске жетті.
Ойынның бірінші сетінде бразилиялық спортшы 6:3 есебімен басым түсті. Алайда екінші партияда Юлия есепті теңестіріп, 7:5 нәтижесін тіркеді. Шешуші үшінші сетте 1:3 есебімен ұтылып жатқан Путинцева қатарынан бес гейм алып, 6:3 есебімен матчты өз пайдасына аяқтады.
Екі сағат 53 минутқа созылған кездесуде қазақстандық теннисші 3 эйс жасап, 15 брейк-пойнттың 6-еуін тиімді пайдаланды. Хаддад Майя 1 эйс орындап, 12 брейк-пойнттың 5-еуін ұтты.
Келесі айналымда Юлия Путинцева әлемнің 20-ракеткасы, украиналық Марта Костюк немесе рейтингте 58-орында тұрған франциялық Эльза Жакемомен кездеседі.
Айта кетейік, Аустралия ашық чемпионатының әйелдер арасындағы жекелей сыны 18–31 қаңтар аралығында өтеді. Турнирдің жалпы жүлде қоры — 74,9 миллион АҚШ доллары. Өткен жылы финалда америкалық Мэдисон Киз белоруссиялық Арина Соболенконы 6:3, 2:6, 7:5 есебімен жеңіп, чемпион атанған болатын.
Қазақстанның бірінші ракеткасы Елена Рыбакина былтыр төртінші айналымда дәл осы Мэдисон Кизге жол берсе, Юлия Путинцева үшінші айналымға дейін жеткен еді.
Сондай-ақ бүгін ерлер арасында Қазақстанның бірінші ракеткасы, әлемнің 10-орнындағы Александр Бублик кортқа шығады. Ол америкалық Дженсон Бруксбимен (ATP №48) күш сынасады. Өткен жылы алғашқы айналымда жеңілген Бублик биыл Гонконгтағы турнирде жеңіске жеткеннен кейін фавориттер қатарынан көрініп отыр.