Астана. 26 қаңтар. /Темірлан Құспаев/ BM.KZ – Өткен жылы Қазақстанның құтқару қызметі түрлі жағдайға тап болған 404 жануарды аман алып қалды.
BM.KZ-тің ресми сұранысына жауап берген ведомство өкілдерінің мәліметінше, 2025 жылы құтқарылған жануарлардың қатарында жабайы қабан, шошқа, жылан, тауық, киік, көгершін, қой, сиыр, иттер мен мысықтар, қарға, жанат, түлкі, жарқанат, түйе, жылқы, үйрек, аққу және бұғылар бар.
Ең қиын құтқару жұмыстарының бірі – мұзға батып кеткен жылқыны құтқару болды. 26 ақпанда Ақтөбе қаласының тұрғындары кешкі серуен кезінде Ілек өзенінің бойынан мұзға батып кеткен жылқыны байқайды. Жануардың тек басы ғана мұздың үстінде көрініп тұрған. Куәгерлер бірден 112 нөміріне хабарласып, құтқарушыларды шақырған.
«Жедел-құтқару жасағы оқиға орнына дейін жаяу жетіп, арқанның көмегімен жылқыны мұз үстіне шығаруға тырысты. Алайда мұз оның салмағына шыдамады. Сол себепті биені жағалауға дейін мұзды ойып жол ашу туралы шешім қабылданды. Үш сағатқа созылған ауыр еңбек нәтижесін берді – жануар құтқарылып, жақын маңдағы шаруашылықтың жылы қорасына орналастырылды», – делінген BM.KZ-ке берілген жауапта.
10 маусым күні Астанада Төтенше жағдайлар министрлігінің қызметкерлері битумға батып қалған итті құтқарып қалды. Иттің ауыр халін көрген иесі құтқарушылардан көмек сұраған. Оқиға орнына жеткен мамандар жануарды арнайы құралдардың көмегімен босатып алған.
Тағы бір күрделі құтқару операциясы өткен жылдың соңында орын алды. Қарағанды қаласында 24 желтоқсан күні көпқабатты тұрғын үйдің жертөлесінде өрт шыққан. Құтқарушылар тұрғындарды эвакуациялаумен қатар, түтінге уланған үй жануарын да құтқарды. Ит есінен танып қалған күйде сыртқа шығарылып, оған тыныс алу аппараты арқылы алғашқы көмек көрсетілді. Нәтижесінде жануардың жағдайы тұрақтанды.
Жалпы 2025 жылы Төтенше жағдайлар министрлігі ең көп мысықтарға (94 рет), жылқыларға (80 рет) және иттерге (77 рет) көмек көрсеткен.