Астана. 4 ақпан. BM.KZ – Ливияның жергілікті бұқаралық ақпарат құралдары елдің батыс бөлігіндегі Зинтан қаласы маңында Сейф әл-Ислам Каддафидің төрт қарулы адамның шабуылы салдарынан қаза тапқанын растады. Бұл жөнінде Euronews хабарлады.
Сейф Каддафидің саяси кеңесшісі Абдулла Осман Facebook желісіндегі парақшасында қысқаша жазба жариялап, ақпараттың рас екенін мәлімдеді. Дегенмен, ол қастандықтың себептері мен оны жасаған тұлғалар туралы нақты дерек келтірмеген.
Сейф әл-Ислам Каддафидің саяси тобы Ливияның бұрынғы басшысы Муаммар Каддафидің ұлының қайтыс болуына байланысты ресми түрде көңіл айтты. Мәлімдемеде қазіргі уақытта марқұмның денесін елге жеткізу мәселесі шешіліп жатқаны айтылған.
Al Hadath телеарнасының Каддафи әулетіне жақын дереккөздерінің мәліметінше, Сейф әл-Ислам резиденциясының маңындағы бақта болған сәтінде ауыр жарақат алған. Шабуылға төрт адам қатысқан, олар оқиға орнынан жедел түрде бой тасалаған. Ал Al Jazeera телеарнасы қастандық жасалар алдында Каддафидің үйіндегі бейнебақылау жүйелері істен шығарылғанын хабарлады.
Сонымен қатар Ливияның Ұлттық бірлік үкіметінің Қорғаныс министрлігіне қарасты 444-ші жауынгерлік бригада Сейф әл-Исламның қарулы қақтығыс кезінде қаза тапқанын алға тартуда. Алайда бригада өкілдері бұл оқиғаға өздерінің қатысы барын жоққа шығарды.
1972 жылдың маусым айында дүниеге келген Сейф әл-Ислам Каддафи Ливияны ұзақ жылдар басқарған Муаммар Каддафидің екінші ұлы болған. Ол Лондон экономика мектебінде докторлық дәрежесін қорғап, бір кезеңде Каддафи режимінің реформаторы ретінде танылды.