Астана. 5 ақпан. BM.KZ – АҚШ соты 2024 жылы АҚШ президенті Дональд Трампқа қастандық жасауға тырысқан Райан Раутты өмір бойына бас бостандығынан айыру жазасына кесті. Бұл туралы сәрсенбі күні USA Today газеті хабарлады, деп жазады Ulysmedia.kz.
— 2024 жылы Оңтүстік Флоридада гольф ойыны кезінде президент Дональд Трампты өлтіруге оқталды деп айыпталған ер адам өмір бойына түрмеге қамалды, – делінген материалда.
Сот оны қастандық ісі бойынша кінәлі деп таныған сәтте Раут сот залында өз-өзіне қол жұмсауға әрекет жасаған.
Трампқа қарсы қастандық жасауға екі рет талпыныс болған. Алғашқысы 2024 жылғы 13 шілдеде Пенсильвания штатында оның сайлауалды митингі кезінде болды. Сол кезде Трамптың құлағы жараланып, бір көрермен қаза тауып, тағы екеуі жарақат алды. АҚШ Құпия қызметі күдікті — 20 жастағы Томас Мэтью Круксты жойғанын хабарлаған.
Екінші қастандық сол жылдың 15 қыркүйегінде Трамптың Флоридадағы гольф-клубы маңында болды.