Астана. 14 ақпан. BM.KZ — Қазақстан ерлер құрамасының көшбасшысы, мәнерлеп сырғанаушы Михаил Шайдоров Италияда өтіп жатқан Олимпиада ойындарының чемпионы атанды.
Қысқа бағдарлама қорытындысы бойынша Шайдоров 92.94 ұпай жинап, бесінші орында тұрған еді. Еркін бағдарламада қазақстандық спортшы төрешілерден 198.64 ұпай алып, жалпы есепте 291.58 ұпай жинады. Ол бағдарламасы барысында бес төрттік секіру орындады. Осы нәтижесінің арқасында Шайдоров бірінші орынға көтеріліп, алтын медаль жеңіп алды.
Екінші орынды жапониялық Юма Кагияма – 280.06 ұпаймен иеленді. Үздік үштікті тағы бір жапониялық Шун Сато – 274.90 ұпаймен түйіндеді.
Сөйтіп, Қазақстан тәуелсіз ел ретінде қысқы Олимпиада ойындарындағы тарихындағы екінші алтын медалін жеңіп отыр. Бұған дейін 1994 жылы шаңғышы Владимир Смирнов Олимпиада чемпионы атанған болатын.
Бұл – Қазақстанның мәнерлеп сырғанаудан Олимпиададағы алғашқы алтын жүлдесі. Бұған дейінгі ең үздік нәтиже 2014 жылы Денис Тен жеңіп алған қола медаль еді.
Жеңістен кейін отандасымыз бұл жүлдеге қол жеткізу қиын болғанын айтты.
«Шынымды айтсам, әлі де сене алар емеспін. Маусым бойы өз-өзіммен күрестім. Бұл маусым мен үшін аса ауыр болды. Жарыстарда бес бірдей төрттік секіруді шамамен үш рет орындап көруге тырыстым, бірақ бірде-бір рет сәтті шықпады. Ал бүгін бәрі сәтті орындалды. Сәті түсіп, қолымнан келді.
Бұл Олимпиадаға ұзақ дайындалдым. Маусым бойы бар ойым – өз ісімді адал атқару болды. Енді еңбегімнің жемісін көріп отырмын. Бұл медальді Қазақстан халқына арнаймын.
Шынымды айтсам, өзге спортшылар үшін де қатты алаңдадым. Өйткені Олимпиада – өте жауапты әрі жүйкеге салмақ түсіретін жарыс. Бойымдағы толқуды еңсере алдым. Ал кейбір спортшылар эмоциясын басқара алмады. Ұпай жарияланғанда аралық үшінші орынға көтерілгеніме де сене алмадым. Ал бірінші орын алғанымды түсінген сәтте тіпті…
Қолдау керемет болды. Әлеуметтік желіге кіру мүмкін болмады. Трибунадағы жанкүйерлердің қолдауы ерекше сезілді. Бәрі кино сияқты. Әзірше не болып жатқанын толық сезініп үлгермедім.
Менің медалім Денис Тен үшін де маңызды болар еді деп ойлаймын. Ол бізге жол ашты. Оның да жолы оңай болған жоқ, менікі де жеңіл болмады. Қазақ мәнерлеп сырғанауының дамуына қосқан үлесі үшін Дениске алғыс айтамын», – деді Олимпиада чемпионы.
Мемлекет басшысы Қасым-Жомарт Тоқаев Михаил Шайдоровты Қысқы Олимпиада ойындарының чемпионы атануымен құттықтап, II дәрежелі «Барыс» орденімен марапаттау туралы шешім қабылдады.