Астана. 10 сәуір. BM.KZ – «Таза Қазақстан» тұжырымдамасын іске асыру аясында Су ресурстары министрлігі бұлақтарды, жағалау аумақтарын тазартуға және суға ұқыпты қарау мәдениетін қалыптастыруға бағытталған «Мөлдір бұлақ» ауқымды экологиялық акциясын бастады.
Су ресурстары және ирригация вице-министрі Талғат Момышевтың айтуынша, 2025 жылдың қыркүйегінде өткен акция еліміздің барлық өңірін қамтыды. Оған 4 мыңнан астам адам қатысып, шамамен 300 тонна қоқыс жиналған, ондаған шақырым жағалау аумақтары тазартылған.
— 2026 жылдың наурызында «Мөлдір бұлақ» науқаны жалғасын тапты. Алғашқы кезеңде Алматы, Жамбыл, Қызылорда, Түркістан облыстары, Жетісу облысы мен Шымкент қаласын қамтыды. Бұл жолы 9 мыңнан астам адам қатысып, 30 бұлақ тазартылды. Сонымен қатар, бұлақ көздерін ашу, қалпына келтіру, аумақтарды абаттандыру, қоқыс жинау және көшет отырғызу жұмыстары жүргізілді, — деді Т. Момышев Орталық коммуникациялар қызметінде өткен баспасөз мәслихатында.
Сонымен бірге, «Қазгидрогеология» ұлттық қызметі республика аумағындағы бұлақтарды түгендеу жұмыстарын жүргізіп жатыр. Алдын ала деректер бойынша 700-ден астам жаңа бұлақ анықталып, архивтік мәліметтер негізінде 2772 бұлақты қамтитын карта жасалған. Мамандар бұлақтарды су тапшылығы жағдайында қосымша су көзі ретінде қарастырып отыр.
Жоба аясында Жамбыл облысында «Болашақтың қайнары» атты су саласындағы алғашқы еріктілер қозғалысы құрылды. Оған Тараз қаласындағы студенттер тартылып, жастардың экологиялық мәдениетін қалыптастыруға басымдық беріліп келеді.
Бастама қоғам тарапынан кең қолдау тапқан. Елдің әр өңірінде азаматтар өз еркімен сенбіліктер ұйымдастырып, бұлақтарды тазарту жұмыстарына белсенді қатысып жатыр. Акцияға ірі компаниялар мен қоғамдық ұйымдар да қосылған.
Алдағы уақытта, 2026 жылдың сәуір айында, «Мөлдір бұлақ» акциясын еліміздің қалған 12 өңірінде өткізу жоспарланып отыр. Жоба жыл сайын тұрақты түрде ұйымдастырылмақ.