Тәуелсіздік алғаннан кейінгі Қазақстан мен әлем арасындағы көпір болып, 30 жыл билік құрған Нұрсұлтан Назарбаев өз өкілетін 2019 жылғы наурызда Қасым-Жомарт Тоқаевқа табыстағанымен, билікті Қауіпсіздік кеңесі арқылы 2022 жылдың қаңтарына дейін қолында ұстады. Дегенмен бұрынғы елбасының есімі тақтан кетісімен тарих беттерінен өшіріле бастағандай.
Ғылым және жоғары білім министрі Саясат Нұрбек президенттің шешімімен Ғылым академиясында қайта реттеу болғанын хабарлаған еді. Өзгерістің нәтижесінде бұрынғы академиктердің мәртебесі жойылып, оның құрамына жаңа 9 азамат қабылданып отыр. Мәртебесі жойылған маңызды тұлғаның бірі – Нұрсұлтан Әбішұлы.
«Бізде қазір Республикалық қоғамдық бірлестік бар. Бұл ескі Ғылым академиясы. Ол 2000 жылдардың басынан бүгінгі күнге дейін өмір сүріп келеді. Сіз айтқандай, бұл адамдардың бәрі сонда. Ол әлі де қатар өмір сүріп жатыр. Сонымен қатар, өткен жылы президенттің шешімімен жаңа Ғылым академиясы құрылды, бірақ басқа мәртебемен. Біріншіден, президент жанында, оны мемлекет қаржыландырады. Тамыз-қыркүйекте сайлаудың жаңа циклы өтеді, біртіндеп мықты ғалымдарды Ғылым академиясына қабылдаймыз», – деді министр. Оның айтуынша, ресми түрде бұрынғы елбасының академик мәртебесі жойылған.
Бұрынғы елбасыға қатысты заңнамалық өзгерістердің басы да, аяғы да бұл емес. Мәселен, 2022 жылдың маусымында өткен референдумнан кейін Конституцияның үштен бір бөлігіне өзгерістер енгізілді. Оның ішінде халық Елбасы туралы баптарды алып тастау туралы ұсынысты қолдады. Референдумнан кейін 2012 жылдан бері тойланып келе жатқан 1 желтоқсан – Тұңғыш президент күні алынып тасталды.
2022 жылғы 2 наурызда Назарбаевтың есімінің алғашқы буыны жазылған «Нұр Отан» партиясы «Аманат» болып өзгерді. 2022 жылғы 17 қыркүйекте мемлекет астанасының Нұр-Сұлтан атауы қайтадан Астана атауына ауысты. 2023 жылғы 1 қаңтарда Нұрсұлтан Назарбаев өмір бойғы мүшесі болады деп саналған Конституциялық кеңес өз қызметін тоқтатты. 2023 жылғы 12 қаңтарда экс-президент «Құрметті сенатор» атағынан айырылды. Сонымен қатар 2023 жылғы 15 ақпанда «Тұңғыш президент – елбасы» туралы заңның күші жойылды. 2023 жылғы 24 шілдедегі президент жарлығымен Мемлекеттік күзет қызметінен Назарбаевтың қауіпсіздігін қамтамасыз ету міндеті алынып тасталды.