Дәурен Қосанов Қорғаныс министрінің орынбасары болып тағайындалды. Бұл туралы бүгін, 30 қыркүйекте Ақорданың баспасөз қызметі айтты, деп хабарлайды «BaiMedia» ақпараттық парталы.
«Мемлекет басшысының өкімімен Дәурен Жұматайұлы Қосанов Қазақстан Республикасы Қорғаныс министрінің орынбасары – Қарулы Күштері Әуе қорғанысы күштерінің бас қолбасшысы болып тағайындалды, ол бұрынғы атқарған лауазымынан босатылды»,—делінген хабарламада.
Айта кетейік, Дәурен Қосанов – 1969 жылы 14 қазанда Павлодар облысы Краснокут ауданы Новотроицкое ауылында дүниеге келген.
1990 жылы Армавир жоғары әскери авиациялық ұшқыштар училищесін, 2005 жылы Ю. А. Гагарин атындағы Әскери-әуе академиясын бітірген. Ал 2013 жылы Ресей Федерациясы Қарулы күштері бас штабының әскери академиясын тәмамдаған.
Әр жылдары Талдықорғандағы «Су-27» эскадрильясының командирі, Қарағанды авиабазасы штабының бастығы, Шымкент авиабазасының командирі, Қазақстан Республикасы Қарулы күштері әуе қорғанысы күштері әскери-әуе күштерінің қолбасшысы, Ақтөбе қаласындағы Әуе қорғанысы күштері әскери институтының директоры қызметтерін атқарған.