KAZINFORM – Каспий теңізінің жағалауындағы қамыс өрті 1 мың гектарға жайылған. Жағалаудағы батпақты аумақтағы 20 гектар қамыс әлі бықсып жатыр.
Атырау облыстық төтенше жағдайлар департаменті қоғаммен байланыс тобының мәліметінше, 2 наурызда бері Каспий теңізінің Құрманғазы ауданы аумағындағы жағалауында қамыс өртенген.
«Құрманғазы ауылынан 40 шақырым қашықтықта «Құрманғазы орманшылығы» КММ аумағында 1000 гектар алаңда қамыстың жанғаны анықталды. Қамыс өртінен ауданның елді мекендеріне төніп тұрған қауіп жоқ», -деп хабарлады департаменттің қоғаммен байланыс тобы.
Бүгін, 4 наурызда өрт ошағына барлау жүргізу үшін «ҚазАвиаҚұтқару» АҚ-ның МИ-8 тікұшағы әуеге көтерілген.
«Теңіз жағалауының батпақты аумағындағы 20 гектарда қамыс бықсып жатыр. Өртенген қамыстың 780 гектары өздігінен сөнді. Ал, Атырау облыстық төтенше жағдайлар департаментінің қызметкерлері 200 гектарда жалынды сөндірді. Жалынды жоюға төтенше жағдайлар департаментінен, «Құрманғазы орманшылығы» КММ-дан 37 адам, 1 техника, 4 мотопомпа, 3 моторлы қайық жұмылдырылды», — деп мәлім етті департаменттің қоғаммен байланыс тобынан.
Қамыс өртін сөндіру әлі жалғасып жатыр. Бірақ, теңіз жағалаудағы батпақ пен жолдың жоқтығы жалынды сөндіруге қиындық тудырып отыр. .
Еске сала кетелік, бұдан бұрын Каспий теңізінің Ресеймен шекарадағы жағалауында қамыс өртеніп жатқанын жазған едік.
Кейін Каспий теңізінің жағалауында 700 гектар қамыс өртенгенін хабарлаған болатынбыз.