Бүгін Ulysmedia.kz ақпараттық порталында «О ком забыли после выборов, или Где сейчас партии, лидеры которых обещали изменить Казахстан» атты Малик Джурсунбек атты журналистің талдамалық мақаласы шығуына байланысты «BAIMEDIA» ақпараттық порталының редакциясына «Байтақ» жасылдар партиясының орталық аппарат жетекшісі Бекберген Керей хабарласты.
Бекберген Дүйсенбайұлының айтуынша, Ulysmedia.kz (https://ulysmedia.kz/analitika/28708-o-kom-zabyli-posle-vyborov-ili-gde-seichas-partii-lidery-kotorykh-obeshchali-izmenit) ақпараттық порталында «Байтақ» жасылдар партиясы туралы толыққанды ақпарат берілмеген. Партия ішінде бүліншілік кесірінен саяси алаңнан кеткен деген сыңайлы ақпарат таратты. Шын мәнінде, «Байтақ» жасылдар партиясы 2022 жылдың 28 қарашасында құрылып, ҚР Әділет министрілігінен ресми куәлігін алған сәттен партия төрағасы болып Азаматхан Әміртаев сайланған. А.Әміртаев қоғамдық-саяси алаңда белсенді жұмыс жасап жатқан азамат. Қазіргі таңда да партия жасыл экологияны дамыту, қоршаған ортаны қорғау шараларын қолға алып, жұмыс жасап келеді. Күн сайын партия қатары мен оларды қолдаушылар саны өсіп келе жатыр» деді ол.
Қандай бұқаралық ақпарат құралдары болмасын қоғамға шынайы ақпаратты жеткізгені дұрыс. Бұл мақсатты алдына қойған «BAIMEDIA» интернет порталы партия кеңсесіне барып жұмыстарымен танысты. Әңгімлесу барысында партияның атқарушы хатшысы Нұрлан Көптілеутегі атқарып жатқан жұмыстарымен және партияның қолға алған жобаларымен таныстырды. Сөз арасында «Өткен сайлау партия үшін мол тәжірбие болды. Жетістіктерімізбен бірге кемшіліктерімізді көруге де мүмкіндіктер туды. Бұдан сабақ ала отырып, саяси алаңдағы күресте біз шынымен шынығып келеміз. Біздің ұранымыз «Таза ниет, таза әрекет және таза саясат». Мақсатымыз ата-бабамыздан мұраға қалған ұлы даламыздың табиғи тазалығын сақтау, өркениетке жеткен сайын бүлініп жатқан экологияны қорғау, қоршаған ортамызды ластанудан сақтау және жасыл экономиканы қолдау болып отыр. Партия болған соң түрлі пікірдегі азаматтар болады. Бұл да демократияның белгісі. Үш, төрт адамның ұйымдастыруымен өткен партияға және оның басшысына қарсы ақпараттық шабуыл жасалынды. Одан кейін қалалық мәслихаттағы екі депутатымыз партияға қарсы шыққан болатын. Алайда, сот шараларының соңында екеуі де өз кінәларын мойындап, қазіргі таңда партия қатарында жұмыс жасап жатыр. Жалпы алғанда, Ulysmedia.kz айтқандай, Азамат Сәрсенбаев партия қатарынан шығып кеткен жоқ. Шығуға ниет білдіргенімен арызын жазбады. Өзара жасалған ортақ келісім-шарт бойынша бізге батыс өңіріндегі экологиялық ахуал туралы ақпараттар жолдап тұрады» деді Нұрлан Болатұлы.
Партия кеңсесінде біз партия төрағасы Азаматхан Әміртаевтың бастамасымен қолға алынып жатқан «Биологиялық өңдеу» және «Арал» өңірін жасылдандыру жобаларымен таныстық. «Байтақ» жасылдар партиясы Өзбекстан жасылдар партиясымен тығыз байланыста нақты жұмыстар жасап жатқанының куәсі болдық.
Су және ирригация министрлігін құру туралы белгілі сарапшылар мен мамандардың басын қосып Президентке хат жазу арқылы тиісті министрлік құрылғанын да тілге тиек ете кету керек. Партияның жастар қанаты да құрылыпты. Ұйымның орталық аппараты, саяси кеңес бюросы, бақылау комитеті мен 20 филиалы толыққанды жұмыс жасауда екен. Партия өзінің су және ирригация және экология табиғи ресурстар министрлігімен «Жол картасын» әзірлеп жүзеге асырып жатырмыз» дейді Нұрлан Болатұлы.
Партия төрағасы Азаматхан Әміртаев Алматы қаласында жастармен бірлесіп сенбілік өткізу шарасына қатысуға кетуіне байланысты тілдесе алмадық.
Осыған дейін, Азаматхан Әміртаев жақында Атырауда өткен үшінші Ұлттық құрылтайға қатысып, секция жұмысында жұмысында экологиялық эмиссия салығын көтеру тақырыбында сөйлегенін жазған болатынбыз.
«Байтақ» былтыр өзінің 1 жылдығын атып өтті. Бұл туралы орталық аппарат басшысы Бекберген Дүйсенбайұлы «Барлық өңір филиалдарының төрағалары мен 150 ден астам делегат қатысып, белсенді азаматтар марапатталып тиісті жұмыстар жүргізілді. Сондықтан да партияның ішкі ахуалы тұрақты. Еліміздің ертеңі, экологиясы мен қоршаған ортаны қорғау саласында нақты жобаларды жетекшілікке алып жұмыс жасап жатқанымызды айтқым келеді» деді.
Жалпы алғанда, жасыл экологияны дамыту, қоршаған ортаны қорғау тақырыбы тек Қазақстан үшін ғана емес бүкіл әлем һәм болашағы үшін аса маңызды мәселе екені сөзсіз. Келешек ұрпақтың таза табиғатта, дені сау өсуі бүгінгі біздің алдымызда тұрған міндет.
Baimedia.kz