Астана. 13 мамыр. BM.KZ – Иран Ормуз бұғазы арқылы тартылған суасты интернет кабельдерін пайдаланғаны үшін арнайы төлем енгізуді жоспарлап отыр. Бұл туралы BILD хабарлады.
Соңғы апталарда Иран әлемдегі маңызды сауда бағыттарының бірі саналатын Ормуз бұғазы арқылы қозғалысты шектеген. Қазіргі уақытта бұл аймақпен мұнай танкерлерінің аз ғана бөлігі қатынап жатыр.
Енді Тегеран бұғаз түбімен өтетін талшықты-оптикалық байланыс желілерінен де табыс табуды көздейді. Әңгіме халықаралық деректерді тасымалдайтын үш ірі интернет кабелі туралы болып отыр. Мамандардың мәліметінше, бұл желілер арқылы күн сайын шамамен 10 миллиард доллар көлеміндегі қаржылық операцияларға қатысты ақпарат өтеді.
Иран билігі жаңа алым арқылы мұнай экспортынан келген шығынның орнын толтыруды жоспарлап отыр. Ресми мәлімет бойынша, шығын көлемі тәулігіне 220 миллион долларға дейін жеткен. Бұл жағдай АҚШ әскери-теңіз күштері Иран порттарына шектеу енгізгеннен кейін қалыптасқан.
Ирандық БАҚ-тың жазуынша, Тегеран аталған кабельдерді пайдаланатын шетелдік компанияларды жыл сайын лицензиялық төлем төлеуге міндеттеуі мүмкін. Сарапшылардың пікірінше, бұл бастама экономикалық қана емес, саяси салдарға да әкелуі ықтимал.
Атап айтқанда, Meta, Amazon және Microsoft секілді америкалық технологиялық компаниялар Ормуз бұғазы арқылы өтетін кабельдерді пайдаланса, Иран талаптарына бағынуға мәжбүр болуы мүмкін. Бұл талаптар қатарында цензураға қатысты шарттардың болуы да ықтимал.
Бұған дейін Ибрахим Резаи АҚШ пен Израиль тарапынан жаңа шабуыл жасалған жағдайда, Тегеран уранды байыту деңгейін 90 пайызға дейін арттыруы мүмкін екенін мәлімдеген еді.