Астана. 7 тамыз. /Әсел Мәдәліқызы/ BM.KZ – Биыл Жоғары оқу орындары үшін 78 мың грант бөлінген. Оның 60%-ы инженерлік, IT, техникалық және жаратылыстану бағыттарына арналды.
Гранттар әсіресе жасанды интеллект, цифрлық технологиялар, энергетика, көлік және құрылыс салаларында маман даярлауға бағытталды.
“ҚР Президенті Қасым-Жомарт Тоқаевтың тапсырмасына сәйкес, экономиканың басым салалары үшін жоғары білікті кадрларды даярлау мақсатында білім беру гранттарының жалпы санының 60%-ы инженерлік және техникалық бағыттар бойынша бөлінді” – делінген министрліктің әлеуметтік желіде таратқан хабарламасында.
Ғылым және жоғары білім министрі Саясат Нұрбек сұранысқа ие мамандықтарға басымдық берілгенін мәлімдеді.
«2023 жылы 186 мың мектеп бітіруші болса, былтыр 188 мың, биыл 216 мың бала мектеп бітіріп, жоғары білімге қадам басты. Жалпы бакалавр деңгейінде 78 мыңға жуық грант, магистратура мен докторантураға 93 мыңнан астам грант бөлінді. Жоғары сұранысқа ие 3 бағыт: педагогика 13 мың грант, ақпараттық технологиялар және жасанды интелект 11 мың, инженерлік бағытқа 18 мыңнан астам грант бөлінді. Осы жылдан бастап біз сирек мамандықтарға ветеринария, энергетика, су шаруашылығы, ирригация, гидротехнологиялар саласында өңірлік квоталарды енгіздік», – дейді Саясат Нұрбек.
Сонымен қатар ведомства басшысы, биыл “Серпін” бағдарламасына бөлінген тегін грант рекордтық көрсеткішке жеткенін айтады. Одан бөлек, ол әскери борышын өтеп қайтқан сарбаздардың да алғаш рет мемлекеттік грант алу мүмкіндігіне ие болғанын атап өтті.
«Осы жылдың тағы бір ерекшелігі – Қорғаныс министрлігімен бірге жасаған жұмысымыздың аясында биыл тұңғыш рет әскери борышын өтеп келген азаматтар 2 мыңға жуық грантқа ие болды. Сондықтан әскери борышын өтеуге ынталандыру бағытында арнайы осындай квота енгізілді. Ата-анасыз жетім қалған балаларға, әлеуметтік аз қамтылған отбасылардан шыққан балаларға да арнайы квота бөліп, қолдайтын болдық. Тағы да бір сүйінші жаңалық – биыл «Серпін» бағдарламасының аясында тарихи рекордтық көрсеткіш орын алды – 83% грант игерілді», – дейді министр.
Бұған дейін “Серпін” бағдарламасы бойынша грант игеру деңгейі 40-50% шамасында болса, өткен жылы бұл көрсеткіш 67%-ға жеткен. Биыл бағдарлама аясында талапкерлер еліміздің 9 өңірінде білім алуға жолдама алды.
Грант иегерлерінің тізімімен мына сілтеме арқылы танысуға болады.