Астана. 1 қыркүйек. BM.KZ — Бүгін, 1-қыркүйек – Білім күнінде еліміздің барлық мектебінде алғашқы қоңырау соғылып, бірінші сыныпқа қабылданған 360 мыңнан астам бала алғаш мектеп табалдырығын аттады.
Оқу-ағарту министрлігінің мәліметінше, олардың 72%-ы қазақ тілінде оқуды таңдаған. Ал 11-сыныпқа 232 мың оқушы көшкен.
Жалпы ел аумағында 8 мыңнан аса мектеп бар. Оның ішінде биыл жаңадан 83 мектеп қосылып отыр. Сөйтіп, 2025-2026 оқу жылында 4,1 млн-ға жуық бала мектеп партасында отыратын болды.
Елімізде 3 мыңға жуық мектеп бір ауысымда білім береді. Бүгінде 232 жаңа мектептің құрылысы жүріп жатыр, тағы 245 ғимарат реновациядан өтіп жатыр. Нәтижесінде жарты миллионнан астам қазақстандық оқушы осы жылдан бастап заманауи әрі жайлы мектептерде білім алмақ.
Жаңа оқу жылы орта білім беру жүйесінде бірқатар өзгеріспен басталып отыр.
«1-сыныптан бастап 11-сыныпқа дейін барлық оқушы үшін оқыту үрдісіне жасанды интеллект негіздері енгізіліп жатыр. Мұндағы басты мақсат, балаларды ЖИ-ді сауатты басқару мен қолдануға үйрету. Өйткені, ол бүгінгі қоғамда базалық технологияға айналған. ЖИ негіздері оқушылардың жас ерекшеліктерін ескере отырып енгізіледі. Оны қолдану мен оның этикасын түсіндіретін интерактивті модульдерден тұратын «Day of AI» онлайн курсы барлық оқушыға қолжетімді болады», – деп жазылған министрліктің хабарламасында.
Екіншіден, 10-11-сыныптан бастап қазақстандық оқушыларға бастапқы кәсіби біліктілік беретін ерте бейіндік бағдарлау жүзеге асырыла бастайды. Ал заманауи жаңа стандарттарға сай білім беруге бағытталған «Келешек» мектептерінде 7-сыныптан бастап оқушыларға кәсіби бағдар беру қолға алынады. Қазір «Маман» деп аталатын арнайы платформа әзірленіп, жетілдіріліп жатыр. Онда әр баланың икемі, қызығушылығы, мүмкіндігі ескеріліп, бағдарлау жұмыстары жүргізіледі.
Үшіншіден, меншік нысанына қарамастан, барлық білім беру ұйымына «Адал азамат» біртұтас тәрбие бағдарламасы енгізіледі. Ол биылғы Президент тапсырмасына сәйкес жалпыұлттық құндылықтар мен Абай философиясына негізделіп, қайта жаңғыртылған болатын. Барлық білім беру ұйымында бірыңғай визуалды ортаға арналған брендбук әзірленіп, бірыңғай дизайн-код енгізілу үстінде.
Төртіншіден, мектептер мен колледждерде буллингке қарсы «ДосболLIKE» бағдарламасы іске қосылады. Сондай-ақ, мектептерде ыстық тамақ ваучерлік жүйе арқылы, «Әлеуметтік әмиян» негізінде төленеді. 2025 жылдың соңына дейін балалардың мүддесін басты назарға алатын «Қазақстан балалары» біртұтас бағдарламасы қабылданады.