Астана. 20 қараша. BM.KZ — АҚШ президенті Дональд Трамп Truth Social әлеуметтік желісінде Эпштейн ісі бойынша файлдарды құпиясыздандыру туралы заңға қол қойғанын мәлімдеді.
— 2019 жылы Трамп кезіндегі Әділет министрлігі (демократтар емес!) айыптаған Джеффри Эпштейн өмір бойы демократ болған, ол демократ саясаткерлерге мыңдаған доллар қайырымдылық жасаған және Билл Клинтон (оның ұшағымен 26 рет ұшқан), Ларри Саммерс (Гарвардты қоса алғанда, көптеген кеңестен кеткен), қара ниетті саяси белсенді Рид Хоффман, азшылық көшбасшысы Хаким Джеффрис (Эпштейн айыпталғаннан кейін Эпштейннен науқанға қайырымдылық сұраған), демократиялық конгресс өкілі Стейси Пласкетт және Демократиялық партияның басқа да көптеген қайраткерлерімен тығыз байланыста болған. Мүмкін, бұл демократтар және олардың Джеффри Эпштейнмен байланысы туралы шындық жақын арада ашылады, себебі мен жақында Эпштейн файлдарын құпиясыздандыру туралы заңға қол қойдым! — деп мәлімдеді Трамп жазбасында.
Әділет министрлігі оның нұсқауымен Конгреске шамамен елу мың беттік құжатты тапсырды.
Америкалық қаржыгер Джеффри Эпштейн 2008 жылы жыныстық қылмыстарға қатысты көптеген айыптармен ұсталды. Оған 45 жыл түрме жазасына тартатын ауыр айыптар тағылды. 2019 жылы ол түрмеде өз-өзіне қол жұмсады.
Эпштейн ісін тергеу барысында 300 гигабайт мәлімет пен заттай айғақ жиналған. Онда жыныстық қылмыс құрбандарының суреттері мен видеолары бар.
АҚШ Әділет министрлігі олардың бірқатарын биыл жариялаған, бірақ ең даулы мәліметтер әлі жарыққа шыққан жоқ.
Қазірдің өзінде атышулы кәсіпкерге байланысы болғаны үшін ғана бірнеше саясаткер мен кәсіпкер қоғам сынына ұшырап үлгерді. Олардың арасында Ұлыбритания королі Карлдың інісі Эндрюді ханзада да бар. Жақында ол сарайдан қуылып, атақтарынан айрылған.
Құпия құжаттарда Қазақстан туралы да мәліметтер бар. Бірақ оларды қылмыстық әрекеттерге жатқызу қиын.
Мәселен, 2024 жылы Эпштейннің паспортына қатысты құжаттар жарияланған. Онда қаржыгер Қазақстанға да сапарлап барғысы келетінін айтқан. Мәліметті былтыр ABC News жариялады.
2025 жылы АҚШ Конгрессі Өкілдер палатасының бақылау жөніндегі комитеті 20 мыңнан астам құжат жариялаған. Онда Эпштейн лоббистер арқылы конгрессмен Даррелл Иссаға ықпал етуге тырысқаны айтылады. Исса сонау 2008 жылы Қазақстанның тұңғыш президент Нұрсұлтан Назарбаевты Нобель бейбітшілік сыйлығына ұсынғандардың бірі.