Қазақстанның «Байтақ» жасылдар партиясы «Green Kazakhstan» қоғамдық қорының құрылатынын ашық жариялауда, деп хабарлайды Баймедиа.кз.
Бұл туралы бүгін пресс-конференцияда «Байтақ» жасылдар партиясының төрағасы Азаматхан Әміртаев пен «Парасат» кәсіпкерлер альянсының басқарма төрағасы Олег Пак «Green Kazakhstan» қоғамдық қорына кеңінен тоқталып өтті.
– Президентіміз жаңа Жолдауында экологиялық мәселелерге тоқталып, ESG қағидаларына сай жоспарлы жұмыс істеу керегін сөз етті. Мәселен, ірі кәсіпорындар мен орналасқан жердегі тұрғындар арасында жиі-жиі жанжал туындап, түсініпеушіліктер пайда болады. Аталған қағидаға сай жұмыс істеу осындай мәселелерді жеңілдетеді.
«Байтақ» жасылдар партиясының да басты мақсаты экологиялық мәселелерді шешуге бағытталғандықтан бұл тақырыпта тәжірибеміз бар. Соңғы жылдары елдегі экология саласын дамыту үшін халықаралық ұйымдардан, мемлекеттен, елшіліктерден, жергілікті басқармалардан көптеп қаржы бөлінуде. Алайда осы қаражатқа жауапкершілік алып, ашықтықты басты ұстаным ететін халықтың сеніміне ие бірде бір қор жоқ. Мәселе елдің экологиясы мен экономикасына, денсаулық сақтау саласына тікелей байланысты болғандықтан қордың жұмыстары ашық әрі сенімді болуы тиіс. Яғни, қайда, қанша теңге аударылып жатыр, нәтижесінде қанша пайда алынды, барлық қаржылық операциялар туралы ақпарат ашық жарияланғаны жөн. Міне, сондықтан партия елдің сұранысына сай қоғамдық қор құруға шешім қабылдады. Қорды басқармағанмен, оның жоспарлы жұмыс істеуіне қоғамдық бақылау жүргізіп отырамыз.
«Green Kazakhstan» қоры мынадай бағыттарды негізге алып отыр:
- Экологиялық бастамаларды қаржыландыру: қор елдегі экологиялық жағдайды жақсартуға бағытталған жобаларды қолдау үшін әртүрлі көздерден қаражат жинайды;
- Экология саласындағы тәжірибе, білім және үздік әлемдік тәжірибелермен алмасу алаңына айналады;
- Қор экология мәселелері бойынша қоғамдық пікірді белсенді қалыптастыра отырып, халық арасында экологиялық мәдениетті ілгерілетеді;
- Қазақстанның инвестициялық тартымдылығын арттыруға ықпал ете отырып, ұлттық ESG қағидаларын әзірлейді;
- Қор Қазақстанның 2060 жылға дейінгі көміртегі бейтараптығына қол жеткізу стратегиясын іске асыруға белсенді қатысатын болады, – дейді партия төрағасы.
Айта кетейік, жаңа қор ҚР Президентінің 2024 жылғы 2 қыркүйектегі Қазақстан халқына Жолдауында айтылған тапсырмаларына сәйкес құрылатын болады.
Партия төрағасының айтуынша, қор өз жұмысын жақын арада бастайды. Алға қойған мақсаттарға жету үшін мемлекеттік органдармен, бизнес-құрылымдармен, халықаралық ұйымдармен және жұртшылықпен тығыз ынтымақтасады деп жоспарлануда.