Әбу Даби, 2024 жылғы 5 наурыз — Қазақстанның Әмірліктердегі Елшісі Мадияр Меңілбеков БАӘ Мемлекеттік министрі Ахмед Али әл-Сайехпен кездесті.
Кездесу барысында аса жоғары және жоғары деңгейде өзара сапарлармен алмасу, сауда-экономикалық ынтымақтастық пен шарт-құқықтық базаны кеңейту мәселелері талқыланды.
Қазақстан Елшісі А. әл-Сайехке Қазақстан Республикасы Премьер-Министрінің орынбасары – Сыртқы істер министрі Мұрат Нұртілеудің БАӘ Сыртқы істер министрі шейх Абдалла бен Заид Әл Нахаянға жолдаған биыл 13-14 маусымда өтетін Астана халықаралық форумына шақыру хатын табыстады.
БАӘ Мемлекеттік министрі шақыруға ризашылығын білдіріп, аталған іс-шараның бүгінгінің өзекті мәселелерін талқылаудағы және жаңа инновациялық шешімдер мен ұсыныстар берудегі айрықша маңыздылығын атап өтті.
Тараптар сауда-экономикалық және инвестициялық бағытта іске асып жатқан жобалар жөнінде өзекті ақпаратпен алмасты.
А. әл-Сайех экономикалық жобалардың қарқынды іске асуы екі ел арасындағы ықпалдастықты одан әрі дамытуға сөзсіз үлес қосатынына назар аударды.
Тараптар ҚР-БАӘ ынтымақтастығын одан әрі нығайту бағытында жұмысты жалғастыру жөнінде уағдаластыққа қол жеткізді.