Астана. 23 қыркүйек. BM.KZ — Маңғыстау облыстық көпсалалы ауруханасында дәрігерлер ұйқы безінің ауыр ауруы — панкреонекрозбен ауырып, өте күрделі жағдайда түскен ер адамды операция жасамай-ақ емдеп шығарды.
Науқас 1982 жылы туған, хирургия бөліміне аса ауыр жағдайда жеткізілген. Мұқият тексерістен кейін дәрігерлер оған «панкреонекроз» диагнозын қойған.
Хирургия бөлімі меңгерушісі Сакен Кублановтың айтуынша, панкреонекроз — әлемдегі ең қауіпті аурулардың бірі. Бұл жағдайда ұйқы безінің тіндері бұзылып, ағзада қатты улану жүреді. Мұндай ауыр науқастарда тірі қалу ықтималдығы шамамен 50/50 болады.
«Бұрын мұндай диагноз қойылған соң, дәрігерлер дереу операция жасайтын. Бірақ енді халықаралық медициналық тәжірибеге сәйкес, алдымен консервативті ем қолданады. Егер дәрі-дәрмекпен емдеу көмектеспесе, онда лапароскопиялық немесе ашық операцияға көшуге болады. Бұл жағдайда біз де операәиясыз емдеу жолын таңдадық. 20 күндік ем-шара нәтидесінде науқастың күйі жақсарып, үйге шығарылды», — деді Сакен Кубланов.
Сырқаттанған жан ауруының себебі дұрыс тамақтанбау және мөлшерден тыс фасфуд тұтыну екенін мойындады.
«Келген кезде халім мүшкіл болды. Бастан-ақ өміріме қауіп төнгенін түсіндім. Дәрігерлер заманауи әдістерді қолданды, операциясыз ем жүргізілді. Қазір өзімді жақсы сезінемін. Барлық дәрігерлерге кәсіби көмектері үшін үлкен алғыс. Мұндай сынақтан кейін дұрыс тамақтану — денсаулықтың негізі екенін түсіндім. Сол себепті баршаңызға зиянды тамақтан бас тартуды және салауатты өмір салтын ұстануды кеңес етемін», — деді сырқаттан аман қалған науқас.