Астана. 15 қазан. BM.KZ – Арал мен Каспий теңіздерінің экологиялық проблемаларын шешуге халықаралық деңгейде қатысуды күшейту қажет. Бұл туралы елордада өтіп жатқан ІІ Astana Think Tank Forum-2025 халықаралық форумында Сыртқы істер министрінің бірінші орынбасары Ержан Ашықбаев айтты.
— Қазақстан климат жөніндегі жаһандық күн тәртіпке қомақты үлес қосады. Тиімді климаттық саясатқа 2026 жылы Астанада өтетін өңірлік климаттық саммит септігін тигізеді. Ол Орталық Азия елдері арасында стратегияларды үйлестіру және ұжымдық шешімдер әзірлеу үшін платформаға айналады. Сонымен қатар Астана Арал мен Каспий теңіздерінің экологиялық проблемаларын шешу мен суын сақтауға халықаралық деңгейде қатысуды күшейтуге шақырады, — деді министрдің бірінші орынбасары.
Сонымен қатар ол еліміз 2060 жылға қарай көміртегі бейтараптығына қол жеткізуге ниетті екенін айтты.
— Қазақстан бұл мақсатқа сындарлы қарайды. Экономиканы әртараптандыруға, жаңартылатын энергия көздерін пайдалануды кеңейте отырып, теңгерімді энергетикалық саясатқа баса назар аударады. Ұлттық өсім мен энергетикалық қауіпсіздік үшін өмірлік маңызға ие дәстүрлі энергетикалық секторды да дамыта береміз. Осынау салмақты әрі шынайы стратегия экономикалық тұрақтылықты сақтай отырып, көміртегі бейтараптығына қол жеткізуге мүмкіндік береді, — деді ол.