Астана. 11 сәуір. BM.KZ – NASA-ның «Артемида-2» миссиясы аясында Айды айналып ұшқан «Орион» ғарыш кемесі Калифорния жағалауы маңындағы Тынық мұхитына сәтті қонды. Қону сәтінің тікелей эфирін NASA-ның YouTube арнасында үш миллионнан астам адам тамашалады, деп хабарлайды ВВС.
Миссия барысында NASA астронавтары Рид Уайсмен, Виктор Гловер және Кристина Кук, сондай-ақ Канада ғарыш агенттігінің өкілі Джереми Хансен Жерден 407 000 шақырымға дейін алыстады. Бұл – адамзат тарихындағы ең алыс қашықтыққа ұшқан экипаж ретінде тіркелді.
1 сәуірде басталған сапар кезінде экипаж мүшелері жаңа буын скафандрларын сынақтан өткізді. Бұл скафандрлар автономды режимде алты күнге дейін тыныс алуды қамтамасыз ете алады.
Ұшу барысында басқару орталығында алаңдаушылық сәттері де болды. Әсіресе, ғарыш кемесі Жер атмосферасының тығыз қабаттарына енген кезде, жоғары температура әсерінен плазма қабатымен қоршалып, байланыс уақытша үзіліп қалды.
Сондай-ақ, экстремалды температураға төтеп беретін жылу қорғаныс қалқанына ерекше назар аударылды. 2022 жылы экипажсыз жүргізілген алдыңғы сынақ кезінде оның бетінде Ай бедеріне ұқсас елеулі зақымдар байқалған еді.
Дегенмен, барлық қауіптерге қарамастан, суға қону операциясы жоспарға сәйкес сәтті өтті. АҚШ-тың батыс жағалауы уақыты бойынша шамамен 17:08-де «Орион» Тынық мұхитына аман-есен қонды.