Астана. 14 сәуір. BM.KZ — Елордада 4 кәсіпорында қызметкерлер алдында 22,2 млн теңге жалақы қарызы бар. Бұл туралы ҚР Еңбек және халықты әлеуметтік қорғау министрлігінің Мемлекеттік еңбек инспекциясы комитетінің Астана қаласы бойынша департаментінің басшысы Ерлан Исмағұлов айтты, деп хабарлайды Kazinform.
Оның айтуынша, бүгінде Астанада 267 906 кәсіпорын жұмыс істейді. Онда шамамен 738 мың адам еңбек етеді. Осыған байланысты жалақының уақытында төленуі мен әлеуметтік кепілдіктердің сақталуын бақылау маңызды бағыттардың бірі болып отыр.
— 2026 жылғы 13 сәуірдегі жағдай бойынша 4 кәсіпорында 64 қызметкерге 22,2 млн теңге жалақы төленбегені анықталды. Мемлекеттік еңбек инспекторлары бұл бағытта тұрақты жұмыс жүргізіп келеді, — деді Ерлан Исмағұлов.
Жалақы қарызы «Food Brands», «TSM.Metal», «Теплолюкс-АЭС» және «MDA Distribution» компанияларында тіркелген.
Оның айтуынша, аталған кәсіпорындардың барлығы тексеріліп, жұмыс берушілер әкімшілік жауапкершілікке тартылған. Оларға жалақыны толық өтеу туралы міндетті нұсқамалар берілген.
— Қарызды өндіріп алу үшін материалдар жеке сот орындаушыларына жолданды. Сондай-ақ мәселенің қылмыстық мәнін анықтау үшін құжаттар Астана қаласының Полиция департаментіне жіберілді. Жалақы қарызы бар кәсіпорындарды банкрот деп тану мәселесі бойынша Астана қаласының Мемлекеттік кірістер департаментімен бірлескен жұмыс жүргізіліп жатыр, — деді ол.