Астана қаласында Қазақстанның Біріккен Араб Әмірліктеріндегі бұрынғы елшісіне қатысты айыптау үкімі шықты . Ол өзінің зайыбын бірнеше жыл бойы жүйелі түрде ұрып-соғып, психологиялық және тән азап келтіргені үшін кінәлі деп танылып, 6 жылға бас бостандығынан айырылды.
«ҚР ҚК 110-бабы 2-бөлігінің 1-тармағы бойынша жеке адамға қарсы жасалған ауыр қылмыстың мән-жайларын, ауырлататын жағдайдың болуын ескере отырып, сот М.-ны айыпты деп танып, оған орташа қауіпсіз мекемеде 6 жыл мерзімге бас бостандығынан айыру жазасын тағайындады», — дейді Астана қаласының қылмыстық істер жөніндегі ауданаралық соты.
Сот дерегінше, күдікті 2014 жылдан бастап жәбірленушімен заңды некеде тұрған. Әйелі екі бала туғаннан кейін үй шаруасында отқан көрінеді. Дипломат жұбайына тағайындалған жәрдемақыны да өзі алып, қажет қаражатты күйеуі беріп отырған.
Сотта анықталғандай, айыпталушы әйелінің туыстарымен және достарымен байланысуына шектеу қойған. Жәбірленушінің сөзінше, әр хабарламаны тексерген және 2019–2024 жылдар аралығында жүйелі түрде күш қолданған.
Сотталушының кінәсі жәбірленуші мен куәлардың айғақтарымен, сараптама қорытындыларымен және бейнематериалдармен толық дәлелденді.
Прокурор соттан 6 жыл бас бостандығынан айыру жазасын сұраса, жәбірленуші тарап 7 жылды талап етті. Сотталушы кінәсін мойындамады, ал қорғаушысы қылмыстық құқық бұзушылық құрамы жоқ деп ақтауды сұрады.
Үкім заңды күшіне енген жоқ.