Астанада үлестік құрылыс саласында азаматтардың қаражатын заңсыз тарту дерегі бойынша қылмыстық іс сотқа жолданды. Бұл туралы қалалық прокуратура хабарлады.
Тергеу деректеріне сәйкес, бір топ адам үш тұрғын үй кешенін салуға рұқсат алмай тұрып, 400-ден астам азаматтан 4,6 млрд теңге көлемінде қаражат жинаған. Алайда жиналған қаржы мақсатсыз жұмсалып, нысандардың құрылысы мүлде басталмаған.
«Тергеу барысында қылмыстық схеманы ұйымдастырушылар тиісті рұқсатсыз және заң талаптарын бұза отырып, үш тұрғын үй кешенін салуға азаматтардан қаражат тартқаны анықталды. Алынған қаражат мақсатсыз жұмсалып, нысандардың құрылысы мүлде жүргізілмеген», — дейді Астана қалалық прокуратурасы.
Құзырлы орган азаматтарды пәтер сатып алмас бұрын компанияның құжаттарын мұқият тексеруге шақырады. Әсіресе, үлескерлерден қаражат тартуға рұқсаты бар-жоғына көз жеткізу аса маңызды.
Айта кетейік, ел Президенті 2025 жылдың шілдесінде үлестік құрылыс туралы заңға өзгерістер енгізді. Толықтыруға сәйкес, енді тұрғындар баспананы құрылысы басталған тұрғын үйден, заңды келісімшартпен ғана сатып ала алады. Заңнама қыркүйек айында нақты күшіне енеді.