Астана. 12 мамыр. BM.KZ – Астанадағы LRT желісі 16-17 мамыр күндері іске қосылып, жолаушылар тасымалын бастайды.
Бұл туралы «City Transportation Systems» ЖШС басқарма төрағасы Асылбек Дүйсебаев мәлімдеді. Оның айтуынша, бастапқы кезеңде жолаушылар ағыны тәулігіне 25-45 мың адам шамасында болады деп күтілуде.
Сонымен қатар, станцияларда коммерциялық нысандар орналастырылмайды. Мұндай шешім технологиялық және өрт қауіпсіздігі талаптарына байланысты қабылданған.
CTS мәліметінше, LRT пойыздарында бірнеше төлем жүйесі қарастырылған. Жолаушылар жол ақысын FacePay қызметі арқылы, яғни Halyk Bank қосымшасындағы бет биометриясы көмегімен төлей алады. Сондай-ақ арнайы LRT көлік картасы қолданылады, оның құны – 1000 теңге. Бұдан бөлек, Visa/MasterCard банк карталары және Kaspi Bank пен Halyk Bank-тің QR-коды арқылы төлем жасау мүмкіндігі бар. Бір реттік билеттерді LRT кассаларынан немесе TVM автоматтарынан сатып алуға болады.
Мектеп картасымен төлем жасаған жағдайда жол жүру тегін болады. Елордадағы 7 жастан 18 жасқа дейінгі оқушылар қоғамдық көлікте тегін жүруге құқылы. Бұған дейін LRT билетінің құны 200 теңге болатыны хабарланған еді.
LRT бағыты Нұрсұлтан Назарбаев халықаралық әуежайы, Қабанбай батыр даңғылы, «Астана жұлдызы» стелласы, Mega Silk Way, Ботаникалық бақ, Абу Даби Плаза, Министрліктер үйі, Арыс көпірі, Қалдаяқов көшесі, Ұлттық музей және Нұрлы жол теміржол вокзалы сияқты қаланың негізгі нысандары арқылы өтеді.
LRT күн сайын таңғы 06:00-ден түнгі 23:00-ге дейін жұмыс істейді.