Астана. 25 ақпан. BM.KZ — ЖСДП фракциясының жетекшісі, депутат Асхат Рахымжанов Мәжілістің жалпы отырысында Бас прокурорға депутаттық сауал жолдап, елімізде бұрын жоғары қызмет атқарған экс-шенеуніктердің Джеффри Эпштейнмен ықтимал байланыстарын тексеру қажет екенін айтты.
Оның айтуынша, жария етілген «Эпштейн файлдарында» мемлекеттік негізгі лауазымда болған «ескі Қазақстанның» саяси элита өкілдерінің деректері кездеседі.
— Мәселен, қазіргі уақытта мемлекеттік сатқындық және билікті басып алуға әрекет жасағаны үшін жазасын өтеп жатқан бұрынғы Премьер-министр және ҰҚК төрағасы Кәрім Мәсімов жазбаларда кемінде 8 рет аталады. Жазбалардан Эпштейн мен Мәсімовтің жеке таныс болғаны байқалады. Көптеген сұрақ туындайды. Неліктен жоғары лауазымды қазақстандық шенеунік Эпштейнмен кездесуге бастамашылық жасап, онымен жолыққан? Бұл кездесулер қай жерде өтті? Сол атақты аралда емес пе? — деді Асхат Рахымжанов.
Депутаттың атап өтуінше, Эпштейн мен Ұлттық банктің бұрынғы төрағасы Қайрат Келімбетовтің Нью-Йоркте бірге демалғаны туралы дерек те шетелдік БАҚ-тың назарын аударған.
— Хат алмасуда Мәсімов пен Келімбетовтің Джеффри Эпштейнмен байланыстары мен кездесулері талқыланады, жеке сәлем жолданады, түрлі бірлескен іс-шаралар сөз болады. Сондай-ақ аты аталмаған басқа тұлғалар, мысалы, мемлекеттік қауіпсіздікке жауапты болған белгілі бір жоғары лауазымды генерал туралы да айтылады. Ол адам кім? Мүмкін, тағы да сол Мәсімов шығар? Мұнан бөлек, жарияланған құжаттардан Эпштейннің Қазақстанға бірнеше рет келгені белгілі болып отыр. Сонымен қатар, файлдарда оның еліміздегі барлық байланысы толық көрсетілмеуі де ықтимал, — деді депутат.
Ол сондай-ақ халықаралық жарияланымдарда АҚШ-та қайғылы жағдайда қаза тапқан модель Руслан Коршунов туралы да айтылатынын атап өтті.
— Қазақстанның жоғары лауазымды шенеуніктерінің мұндай тұлғамен кез келген байланысы бірқатар сұрақ туындатады. Джеффри Эпштейн Қазақстанға қандай мақсатпен жиі келген? Сол кезеңдегі қандай жоғары лауазымды тұлғалармен байланыста болған? Құпия ақпараттың сыртқа кетуіне жол берілді ме? Мемлекеттік шешімдер қабылдаған тұлғаларға сыртқы ықпал ету арналары жасалмады ма? Оларға қатысты әшкерелейтін материалдар жиналмады ма? Қазақстандық шенеуніктердің Эпштейнмен байланыстары сол кездегі ел басшылығы тарапынан рұқсат етілді ме? Қазақстан азаматтары ел тағдыры кімдердің қолында болғанын және оның күмәнді беделге ие жабық клубтарда сауда нысанына айналмағанын білуге құқылы, — деп атап өтті Асхат Рахымжанов.
Осыған орай Мәжіліс депутаты Бас прокуратура мен Ұлттық қауіпсіздік комитеті басшылығына мындай өтінішін білдірді:
- «Эпштейн файлдарында» аталған қазақстандық лауазымды тұлғалар мен олармен байланысы бар адамдар туралы ақпаратты, кездесулердің сипаты мен мақсаттарын тексеру, Қазақстан аумағында немесе шетелде басқа қазақстандық саясаткерлердің, кәсіпкерлердің және шоу-бизнес өкілдерінің Джеффри Эпштейнмен байланыстары болған-болмағанын анықтау;
- ұлттық қауіпсіздікке төнуі мүмкін қатерлерге, оның ішінде мемлекеттік құпиялардың жария болуын қоса алғанда дербес ақпараттардың жылыстатылуын, лауазымды тұлғаларды бопсалау тәуекелдеріне құқықтық баға беру;
- тексеру нәтижелері мен болашақта мұндай жағдайлардың алдын алу үшін қабылданған шаралар туралы Парламент пен қоғамға хабарлау.