Астана. 23 желтоқсан. BM.KZ – Алматы қаласының экс-әкімі, қазір Президент әкімшілігінде жұмыс істейтін Ерболат Досаев «Самұрық-Қазына» АҚ-ның Директорлар кеңесінің мүшесі болып сайланды. Бұл туралы компанияның баспасөз қызметі хабарлайды.
Ресми дереккөз мәліметіне сүйенсек, Ерболат Асқарбекұлы аталған құрылымның Директорлар кеңесінің мүшесі ретінде бекітілген. Осылайша бүгінгі таңда алқалы органның құрамы 7 адам мен 1 виртуалды жүйеден жасақталып отыр.
Кеңеске төрағалық ету міндеті Қазақстан Республикасының Премьер-Министрі Олжас Бектеновке жүктелген. Басқарушы топтың қатарында Ерболат Досаевпен бірге қордың Басқарма төрағасы Нұрлан Жақыпов бар.
Сондай-ақ маңызды шешімдерді қабылдауға тәуелсіз директорлар атсалысады. Олардың санатында белгілі қаржыгер Болат Жәмішев, шетелдік сарапшылар Вонг Хэн Файн, Сутера Лука және Мұхаммед Жәмил әл Рамахи есімді азаматтар тіркелген. Соңғы болып директорлар кеңесінің құрамына SKAI (Samruk-Kazyna Artificial Intelligence) енгізілген.