Астана. 12 тамыз. /Нұргүл Ерғалиқызы/ BM.KZ – Жапонияның Осака қаласында өтіп жатқан EXPO-2025 халықаралық көрмесінде Қазақстан Республикасының Ұлттық күні салтанатты түрде аталып өтті. Бұл күн аясында Қазақстанның мемлекеттік туы ресми түрде көтеріліп, ұлттық нақыштағы түрлі мәдени іс-шаралар ұйымдастырылды.
Мереке аясында көрме аумағында ұлттық киім киген өнерпаздар, шаш үлгісін жасаушылар мен тарихи кейіпкерлер, батырлар ерекше көңіл-күй сыйлады.
Кештің шарықтау шегі қазақстандық өнер шеберлерінің EXPO Hall «Shining Hat» сахнасында өткен кешкі концерті болды. Шамамен 3 мың көрерменді жинаған бұл мәдени бағдарлама, көрмеге келген шетелдік қонақтар мен жергілікті тұрғындарға қазақ халқының бай өнерін паш етті.
Концертте Дина Нұрпейісова атындағы халық аспаптар академиялық оркестрі, Sarmad және ArtDombyra ансамбльдері этно және фольклорлық әуендермен әсер қалдырды. Сонымен қатар, опера сахнасының жұлдыздары Зарина Алтынбаева мен Алтынбек Әбілда өздерінің зор дауысымен көпшілікті тәнті етті. «Бірлік» би ансамблінің көркем хореографиясы да мерекелік кештің көркін аша түсті. Кеш барысында К. Сағырбайұлы, Н. Тілендиев, К. Ахмедияров, Л. Хамиди, Е. Брусиловский сынды халқымыздың сүйікті композиторларының шығармалары орындалды.
Сондай-ақ, көрме аумағында Астана қаласы мен Ұлытау облысының инвестициялық және туристік әлеуетін таныстыратын арнайы стендтер қойылды. Бұл павильондарда қонақтар аймақтардың даму мүмкіндіктерімен танысып, Қазақстанның заманауи жетістіктері мен табиғи сұлулығына куә болды.
Айта кету керек, қазақстандық павильон көрме қонақтарының ерекше қызығушылығына ие болып отыр. Бүгінге дейін павильонды 900 мыңға жуық адам тамашалаған.
Еске сала кетейік, EXPO-2025 көрмесі 2025 жылдың 13 сәуірінен 13 қазанына дейін өтетін шара Юмешима атты жасанды аралда ұйымдастырылып жатыр. Көрменің басты тақырыбы «Өміріміз үшін болашақ қоғамды бірге құру», ал мазмұны үш негізгі бағытты қамтиды: «Өмірді сақтау», «Құқықтар мен мүмкіндіктерді кеңейту» және «Өмірді біріктіру».
EXPO-2025 көрмесіне әлемнің 160 елі мен 9 халықаралық ұйым қатысып жатыр. Ұйымдастырушылар, көрмені 28 миллионнан астам адам тамашалайды деп болжап отыр.