Астана. 2 қазан. BM.KZ – Грекияда өткен жалпыұлттық ереуіл елдің көлік жүйесі мен мемлекеттік қызмет көрсету саласын тұтас тоқтатты, деп хабарлайды Euronews.
24 сағатқа созылған ереуіл кезінде ел астанасы Афинада пойыздар мен таксилер мүлдем жүрмеді. Автобустар, метро, трамвай және троллейбустар қысқартылған кесте бойынша ғана қозғалды. Сонымен қатар, ереуіл Грекияның өзге өңірлеріне де әсер етіп, мектептер, соттар мен мемлекеттік ауруханалар уақытша жұмысын тоқтатты.
Наразылық шарасын мемлекеттік қызметкерлер мен жеке сектор атынан шыққан кәсіподақтар ұйымдастырды. Олар еңбек заңына енгізілген жаңа өзгерістерге қарсы. Атап айтқанда, жаңа ережеге сәйкес жұмыс күні 13 сағатқа дейін ұзартылып, апталық еңбек уақыты 48 сағатты құрайды. Сонымен бірге үстеме жұмыс жылына ең көбі 150 сағатпен шектелмек.
Кәсіподақтар бұл талаптар жұмысшылардың құқықтарын шектеп, олардың еңбегін теріс пайдалануға жол ашады деп есептейді.
«13 сағаттық жұмыс күніне көңіліміз толмайды. Шаршау – бұл даму емес, адамның шыдамының да шегі бар», – делінген жеке сектор кәсіподақтарының мәлімдемесінде.