Жерлеу рәсімі бизнесімен айналысатын отбасын бәсекелестері былтыр желтоқсан айында бауыздап кеткен, деп хабарлайды Баймедиа.кз.
Ал оның кәмелетке толмаған ұлының денесі өз ауласынан табылған. Қанды қылмысқа қатысы бар деген күдікпен ұсталған үш адамның екеуі ерлі-зайыптылар. Олар да бұған дейін жерлеу қызметін көрсетіп келген.
Жұртты шошытқан қанды оқиға Петропавл маңындағы жеке секторда болған. Байланысқа шықпай қалған Вадим мен Юлияның денесін туыстары өз үйінен тапқан. Ал 17 жастағы ұлы мектепте жоғалып кеткен. Оның да жансыз денесі өз ауласынан табылды. Көп ұзамай күдіктілер де ұсталды.
Сергей Емельянов пен 25 жастағы Данил Орлов адам өлтіру және тонау бабымен сотталып жатыр. Олар марқұмдардың үйінен 100 мың теңге мен құны 2 млн теңге болатын бағалы заттарды қолды қылған.
Сондай-ақ бүтіндей отбасы мүшелерінің өліміне жерлеу рәсімімен айналысатын 42 жастағы Ирина Скоробогатованың қатысы бар деген болжам айтылған. Өйткені ол күдіктінің бірімен жақын байланыста болып, тіпті бір үйде бірге тұрып жүрген. Осылайша сот оның сыбайласын өмір бойына бас бостандығынан айырды. Ал оның серіктесіне сот 21 жыл 8 ай жаза кесті. Ал бақталасын өлтіруге тапсырыс берді деп айыпталған Скоробогатова үш жылға бас бостандығынан айырылды. Сот тергеу кезінде оның кінәсі дәлелденбегенін айтады.
«Бастапқыда сотқа дейінгі тергеу органы мен мемлекеттік айыптаушылар Скоробогатоваға қылмыстық топпен алдын ала сөз байласу арқылы екі адамды өлтіруге итермеледі деген айып таққан. Алайда сотқа бұл күдікті растайтын жеткілікті дәлелдемелер ұсынылмады. Осылайша сот оған аса ауыр қылмыс туралы хабарламағаны үшін ҚР ҚК 434-бабы бойынша жаза кесті», — деді судья Айдарбек Бекқожинов.