Астана. 22 қыркүйек. BM.KZ – Бүгін облыс әкімі Нұрдаулет Қилыбайдың төрағалығымен ИКОМОС техникалық бағалау миссиясының өкілдерімен «Маңғыстау түбегінің жерасты мешіттерін» ЮНЕСКО-ның Бүкіләлемдік мұралар тізіміне енгізу мәселесі бойынша кеңес өтті.
Отырыс барысында Мемлекет басшысы Ұлттық құрылтайда берген тапсырмаға сәйкес өңірдегі Бекет-ата, Қараман-ата, Шақпақ-ата, Шопан-ата және Сұлтан-епе жерасты мешіттерін халықаралық тізімге енгізу мәселесі талқыланды.
Бұл ескерткіштер 2021 жылы ЮНЕСКО-ның алдын ала тізіміне енгізілген болатын. Осы бағытта Мәдениет және ақпарат министрлігінің жетекшілігімен ғылыми-жобалық құжаттама әзірленіп, Париждегі штаб-пәтерге жіберілді. Бұдан бөлек, қорғалатын аумақтар айқындалып, ақпараттық тақталар орнатылды, фото және бейнематериалдар дайындалды.
Осы тапсырма аясында өңірге халықаралық сарапшылар келді. Олардың қатарында – Бурсадағы Улудаг университетінің профессоры, ИКОМОС сарапшысы Фиген Кывылджым Чоракбаш, Қазақстанның ЮНЕСКО және ИСЕСКО істері жөніндегі Ұлттық комиссиясының мүшесі Дмитрий Воякин, «Қазреставрация» мемлекеттік кәсіпорнының бас директоры Олжас Шариязданов және мекеменің сәулетшісі Ләззат Бейсембаева бар.
Әкім өз сөзінде Маңғыстаудың тарихи-мәдени мұрасының байлығын атап өтті.
«Маңғыстау – терең тарихы бар өлке. Мұнда жерасты мешіттері, көне зираттар мен кесенелер орналасқан. Олар – сәулет өнерінің айрықша ескерткіштері. «Мәдени мұра» бағдарламасы аясында осы нысандарды қорғауға бағытталған кешенді жұмыс атқарылды. Нәтижесінде бес жерасты мешіті ЮНЕСКО-ның алдын ала тізіміне енгізілді. Қазіргі уақытта қорғалатын аумақтар белгіленіп, ғылыми-зерттеу жұмыстары жүргізілуде. Бұл нысандардың Бүкіләлемдік мұралар қатарына енгізілуі халқымыздың тарихи құндылықтарын сақтап қана қоймай, елдің мәдени және экономикалық дамуына серпін береді», – деді Нұрдаулет Қилыбай.
Кездесу соңында өңір басшысы миссия жұмысының облыс үшін маңыздылығына тоқталып, барлық шараның халықаралық талаптарға сәйкес жалғасатынын жеткізді.