Қазақстан Республикасының Президенті Қасым-Жомарт Тоқаев құқық қорғау органдарының алғашқы кеңейтілген алқа мәжілісінде азаматтардың жеке деректерінің қауіпсіздігіне байланысты мәселелерге ерекше тоқталып, бұл бағыттағы жұмысты күшейту жөнінде нақты тапсырмалар берді.
Мемлекет басшысы соңғы уақытта интернет және телефон арқылы жасалатын алаяқтық қылмыстарының күрт өскенін атап өтті. Мұндай әрекеттер, әдетте, шетелден басқарылатын ұйымдасқан қылмыстық топтар тарапынан жүзеге асырылатыны белгілі. Бұл тергеу барысын айтарлықтай қиындатып отыр.
– Алаяқтық әрекеттердің алдын алу – аса маңызды. Қазіргі уақытта Ұлттық банк жанынан заманауи антифрод-орталық құрылды. Сонымен қатар, банк пен ұялы байланыс операторларының инфрақұрылымын заңсыз пайдалануға жол бермеу мақсатында ортақ жауапкершілік жүйесі енгізілуде. Қазақстан азаматтарының жеке деректерін сенімді қорғау – біздің басты міндетіміз, – деді Президент.
Президент халықтың қаржылық сауаттылығын арттыру қажеттілігін де атап өтті. Оның айтуынша, бұл бағытта барлық деңгейдегі депутаттармен бірлесіп, алаяқтыққа қарсы иммунитет қалыптастыру маңызды.
Сондай-ақ Мемлекет басшысы заңсыз қаржы айналымына тартылып жатқан азаматтар, әсіресе жастар арасындағы жағдайда назардан тыс қалмағанын ескертті. Соңғы бір жарым жылда 50 мыңға жуық адам, оның ішінде көбісі жастар, өз шоттарын ақшалай сыйақы үшін алаяқтарға пайдалануға берген.
– Бұл өте қауіпті үрдіс. Жастарымыз мұндай әрекеттердің салдарын жете түсінбейді. Қаржы нарығын реттеу және дамыту агенттігі банктермен бірлесіп, алаяқтық шоттарды дер кезінде анықтап, бұғаттау жүйесін қалыптастыруы қажет, – деп атап өтті Президент.
Бұдан бөлек, Қасым-Жомар Кемелұлы SIM-карталардың бақылаусыз таралуына байланысты алаңдаушылығын білдірді. 2025 жылдың басынан бері елімізде үшінші тұлғалардың атына рәсімделген 100 мыңға жуық SIM-карта анықталған. Олар негізінен қылмыстық мақсаттарда пайдаланылған.
Осыған орай Мемлекет басшысы Үкіметке және уәкілетті мемлекеттік органдарға SIM-карта сату үдерісін нақты реттеуді, сондай-ақ байланыс операторларының жауапкершілігін күшейтуді тапсырды.
Мәжіліс қорытындысында Қасым-Жомарт Тоқаев азаматтардың жеке деректерін қорғау – ұлттық қауіпсіздіктің бір бөлігі екенін баса айтып, бұл бағытта барлық қажетті шаралар жедел әрі тиімді түрде жүзеге асырылуы керек екенін нақтылады.