Астана. 28 желтоқсан. BM.KZ – Қазақстанның еңбек сіңірген қайраткері, белгілі актер, сценарист әрі кинодраматург, «Менің атым Қожа» фильміндегі басты рөлді сомдаған Нұрлан Сегізбаев өмірден өтті.
Қаралы хабарды Мәдениет және ақпарат министрлігі жеткізді.
— Нұрлан Санжарұлы — қазақ мәдениеті мен өнерінің дамуына елеулі үлес қосқан тұлға. Ол өз ғұмырын шығармашылыққа, ұлттық руханиятқа арнап, кейінгі ұрпаққа өнеге болатын мол мұра қалдырды. Өнерсүйер жұртшылыққа әлі күнге құндылығын жоймай келе жатқан Абдолла Қарсақбаевтың «Менің атым Қожа» фильміндегі басты рөлімен танымал өнер иесі қазақ кино өнеріндегі дара тұлға болды. Оның экранда жасаған көркем бейнелері отандық өнер тарихында айрықша орын алады. Нұрлан Санжарұлының жарқын бейнесі, шығармашылық мұрасы мен ғибратты ғұмыр жолы халқымыздың жадында мәңгі сақталады деп сенеміз, — делінген ведомство хабарламасында.
Ол тек актер ғана емес, сценарист әрі кинодраматург ретінде де қазақ мәдениетіне еңбек сіңірді.
Айта кетейік, Нұрлан Санжарұлы соңғы жылдары ауырып жүрген. Оған созылмалы обструктивті өкпе ауруының (ХОБЛ) 4-дәрежесі диагнозы қойылған. Бұл дерт тыныс жолдарындағы ауа ағынын шектеп, дем алуды қиындатады. Дәрігерлер биылғы жылдың сәуір айында оның жағдайы ауыр екенін айтып, небәрі бірнеше айы қалғанын мәлімдеген.