Астана. 29 шілде. BM.KZ – Жомарт жандардың қайырымдылық қаражатына олар елордадан үш пәтер, жер телімі мен бес көлік сатып алған. Қаражаттың бір бөлігі букмекерлік кеңсеге ставкалар жасауға жұмсалған. Ал науқас баланы емдеуге небәрі 6,4 миллион теңге ғана кеткен.
Қаржы мониторингі агенттігінің Астана қалалық департаменті ұлын емдетуге қаражат жинаған ерлі-зайыптыға қатысты алаяқтық дерегі бойынша тергеу жүргізіп жатыр.
Тергеу мәліметінше, баланың қатысуымен түсірілген видеороликтер, эмоционалды жазбалар мен Instagram және Facebook желілеріндегі мақсатты жарнама он мыңдаған қазақстандықтың жүрегіне әсер еткен.
«Азаматтардың сенімі мен жанашырлығын пайдалана отырып, күдіктілер 1,3 млрд теңгеден астам көлемде қаражат жинаған. Алайда, баланың еміне тек 6,4 миллион теңге жұмсалған. Қалған қаражат ерлі-зайыпты жеке қажеттіліктеріне пайдаланылған. Нақты айтқанда, елордада 3 пәтер, жер телімі, 5 автокөлік сатып алынған. Сонымен қатар, қаражаттың бір бөлігі құмар ойындарына жұмсалған», – делінген Қаржы мониторингі агенттігінің хабарламасында.
Жиналған қаражатты жүйелі түрде көбейту мақсатында ерлі-зайыптылар түскен қаражаттың үштен бір бөлігін (481 миллион теңгеден астам) әлеуметтік желілердегі парақшаларын жарнамалауға жұмсаған. Олар бұл үшін Meta Ads таргеттелген жарнамасын қолданған. Нәтижесінде аудитория кеңейіп, қаржылай көмектің көлемі айтарлықтай артқан.
«Күдіктілер Түркиядағы LIV Hospital клиникасында 84 миллион теңге тұратын ота жасатамыз деген желеуді де пайдаланған. Қажетті сома жиналғанымен, шетелде ота жасалмаған. Керісінше, олар Instagram парақшасында әуежайдағы «ұшып бара жатқан» көріністі бейнелейтін ролик жариялап, операция сәтті өтті деген жалған ақпаратпен жазба салған. Сотқа дейінгі тергеп-тексеру басталғанын білген соң, олар қылмыстық жолмен алынған активтерді тәркілеуден жасыру мақсатында жер телімін үшінші тұлғаның атына рәсімдеген. Алайда тергеу бұл мәміленің жалған екенін дәлелдеді», – деп хабарлады Қаржы мониторингі агенттігі.
Соттың санкциясымен қылмыстық жолмен алынған табысқа сатып алынған барлық мүлікке тыйым салынды. Күдіктілерге қатысты бұлтартпау шарасы ретінде үйқамақ тағайындалды.