Астана. 12 мамыр. BM.KZ – Қазақстанда бақ-бақ гүлін жұлғандарға 13 млн теңгеге дейін айыппұл салынуы мүмкін, деп хабарлайды Курсив.
Бұл туралы Экология және табиғи ресурстар вице-министрі Нұркен Шәрбиев айтты.
Оның айтуынша, заң бойынша көксағыз бақбағын жұлғандарға қатаң жаза қарастырылған. Өсімдіктің бұл түрі сирек кездеседі және қызыл кітапқа енгізілген. Сондықтан тыйым барлық бақ-бақ түрлеріне емес, тек осы өсімдікке ғана қатысты.
Оны жұлғандарға 3000 АЕК көлемінде айыппұл қарастырылған (2026 жылы бұл шамамен 12 975 000 теңге).
«Бұл – жойылып кету қаупі бар сирек өсімдік, сондықтан осындай қатаң айыппұл енгізілген. 2019 жылы депутаттардың бастамасымен айыппұл мөлшері 10 есеге артты, мақсат – сирек және жойылып бара жатқан түрлерді қорғау», – деді Шәрбиев Үкіметтегі брифингте.
Вице-министрдің айтуынша, көксағыз бақбағы негізінен еліміздің оңтүстік өңірлерінде өседі.