Қазақстанда алғашқы атом электр станциясын (АЭС) салу жобасын ресейлік «Росатом» мемлекеттік корпорациясы іске асырады. Бұл шешім ҚР Атом энергиясы жөніндегі агенттігінің кешенді сараптамасы нәтижесінде қабылданды.
Агенттік «Қазақстандық атом электр станциялары» ЖШС және француздық Assystem инженерлік компаниясымен бірлесіп, әлемдік реакторлық технологияларды бағалаудың арнайы әдістемесін әзірлеген. Сараптама барысында қауіпсіздік, технологиялық тиімділік, қаржылық негіздеме, халықаралық тәжірибе, кадрлар даярлығы және өндірісті жергіліктендіру деңгейі сияқты негізгі көрсеткіштер ескерілген.
Нәтижесінде, Қазақстан үшін ең тиімді әрі оңтайлы шешім – «Росатом» ұсынысы болып танылды.
Қазіргі уақытта тараптар мемлекеттік экспорттық қаржыландыру механизмін пайдалану арқылы жобаны іске асыру мүмкіндігін талқылап жатыр. Сонымен қатар, Атом энергиясы агенттігі шетелдік серіктестермен бірлесіп, халықаралық консорциум құру бойынша жұмысты жалғастыруда.
АЭС құрылысы Қазақстанның энергетикалық қауіпсіздігін арттырып, экологиялық таза электр энергиясымен қамтамасыз етуге мүмкіндік береді.