Астана. 20 тамыз. BM.KZ – Халықаралық теннис адалдық агенттігі (ITIA) Қазақстандық теннисші Арсланбек Айтқұловты төрт жылға спорттан шеттету туралы шешім қабылдағанын хабарлады.
21 жастағы спортшының қаңтар айында Дохада өткен ITF жарысы кезінде тапсырған сынамасынан екі түрлі тыйым салынған зат – лигандрол (анаболикалық агент) және метилгексанамин (стимулятор) табылған.
Агенттік ойыншының бұл заттардың ағзасына кездейсоқ түскенін дәлелдей алмағанын атап өтті. Соған байланысты Айтқұлов допинг ережелерін бұзғаны үшін кінәлі деп танылды.
Айтқұловқа 2024 жылдың 23 наурызынан бастап уақытша шеттету шарасы қолданылған. Енді бұл мерзім негізгі жазасына есептеліп, оның толық дисквалификациясы 2028 жылдың 22 наурызына дейін жалғасады.
Шешімге сәйкес, теннисші осы уақыт аралығында ATP, WTA, ITF және басқа да ұлттық федерациялар ұйымдастыратын ресми турнирлерде ойнауға, бапкерлік етуге немесе қатысуға тыйым салынады. Сондай-ақ, оның допинг сынамасынан кейінгі барлық жарыстағы нәтижелері, жүлделері мен рейтингтік ұпайлары жойылды.
Айта кетейік, Арсланбек Айтқұлов 2023 жылдың қараша айында ATP рейтингінде өзінің ең жоғары көрсеткіші – 1250-орынға көтерілген еді.