Шымкент. 4 тамыз. BM.KZ/Нұргүл Ерғалиқызы/ – Елімізде, қоғамдық орында бет-әлпетті жауып жүруге ресми түрде тыйым салынды.
Бетін тұмшалағандарға қатысты енгізілген шектеулерге қоғам пікірі сан-саққа бөлінді. Бірі, бұл қадамды қоғамдық қауіпсіздікті қамтамасыз ету үшін қажетті шара деп санаса, басқалары адамның еркіндігі мен діни сенімін шектейтінін айтып, қарсылық танытуда.
Қоғамдық қауіпсіздік немесе жеке еркіндіктің шектеуі?
Заңды қолдаушылардың пікірінше, бетін тұмшалаған киімдер қоғамдық қауіпсіздікке қатер төндіруі мүмкін. Яғни, бұл жеке тұлғаның толық анықталмауына жол ашады. Сонымен қатар, тергеу жұмыстарында немесе қоғамдық орындарда идентификация процесін қиындатады. Ең бастысы, бұл тыйым бетті толық жауып тұратын киімдерге ғана қатысты. Мәселен, балаклавалар, бетперде мен никаб.
Ал, діни тұрғыдан қарағанда, бұл шариғатта жоқ дейді ҚМДБ -ның өкілі. Бетін тұмшалаған әйелдерге тыйым салу мәселесі, әлеуметтік, діни және мәдени тұрғыдан күрделі болып тұр дейді.
«Нихаб мәселесі, бұл шариғат талабында ондай нәрсенің талап етілмейтінін, ол адамның еркіне, халықтың менталитетіне байланысты өзгеріп отыратын мәселе екенін айтқымыз келеді. Өзіміз де жүрген жерімізде бәрін түсіндіріп жүреміз. Біздің ел оған сәйкес келмейді. Сенің парызың емес деп. Ортамызға, айналамызға қарап мәселе өзгере береді», — дейді ҚМДБ Шымкент қаласы бойынша «Әйел қыздар» секторының жетекшісі Балжан Асылханқызы.
Оның айтуынша, кейбір әйелдер ислам дінінің талаптарына сәйкес, беттерін тұмшалауды міндетті деп санайды.
«Көбінесе бетін тұмшалаған қыздар мешітке келмейді. Біреу-екеу келсе, жеке отырып сөйлесеміз. Егер білместігінен болып жатса, елімізде дұрыс еместігін түсіндіреміз. Мысалы, күйеуім солай айтты дейтіндер бар. Біреулер парыз, уәжіп деп ойлайды. Үкімі солай дейтіндер бар. Бетімді ашсам, күнахар болып қаламын деп ойлайтындар бар. Бірақ, біз оны түсіндіреміз. Ислам тарихы бойынша қашан басталғанын барынша жеткізуге тырысамыз», — дейді ҚМДБ Шымкент қаласы бойынша «Әйел қыздар» секторының жетекшісі Балжан Асылханқызы.
Естеріңізге сала кетейік, бетті жауып тұратын киімді медициналық мақсаттар да, азаматтық қорғау үшін, ауа райы жағдайларында, спорттық, мәдени-бұқаралық іс-шараларға қатысатын адамдарға киюге рұқсат.
Жалпы алғанда, қоғамдық орындарда бет-әлпетті тануға кедергі келтіретін киім-кешекті киіп жүруге тыйым салынды.