Астана. 9 қазан. BM.KZ – Шымкент қаласы әкімінің экс орынбасары Руслан Берденовті атып, оқ жарақатын салған Ернар Жиембайға қатысты апелляциялық соттың шешімі шықты. Шымкент қалалық соты алғашқы инстанцияның үкімін өзгеріссіз қалдырды. Яғни, Ернар Жиембай «Адам өлтіру» бабымен кінәлі деп танылып, 9 жыл жазасын түрмеде өтейтін болды.
«Сот алқасы қаулы етті. Сотталған Ернар Жиембайға қатысты сот үкімі өзгеріссіз, қанағаттандырусыз қалдырылсын», – деді алқа төрағасы Бәйдібек Дүйсебеков.
Айта кетейік, сотталушы, апелляциялық соттан жаза мерзімін өзгертпесе де, айыптауды алмастыруды сұраған болатын. Ол, үкіммен келіспейтінін, адам өлтіруге ниеті болмағанын мәлімдеді.
Ал, жәбірленуші тарап, сот қаулысынан соң, экс орынбасардың денсаулығын оңалтуға кеткен шығынның бәрін өндіру үшін азаматтық талап-арыз түсіретінін жеткізді.
«Шымкентте өзгере ме, жоқ па күмән болды. Күмәніміз ақталды, көріп отырсыз. Сот үкімі өзгерген жоқ. Өз тарапымыздан жоғарғы сотқа шағымданамыз. Сонымен қатар, азаматтық талап-арыз береміз», – деді Руслан Берденовтың ресми өкілі, Жеңіс Тынысбек.
Еске сала кетейік, 2025 жылдың 21 сәуірінде қала әкімінің сол кездегі орынбасары, Руслан Берденовке әкімдік ғимаратының маңында оқ атылған болатын. Оқ ату дерегі бойынша қалалық тұрғын үй басқармасына қарасты «Тұрғын үй құрылыс» ЖШС-нің бұрынғы басшысы, 31 жастағы Ернар Жиембай ұсталған. Нәтижесінде, «Адам өлтіру» бабымен кінәлі деп танылып, 9 жылға сотталған. Айта кетейік, осыдан бірер күн бұрын, бірінші сатылы сот үкіміне тараптардың бәрі келіспей, апелляциялық шағым түсірген еді.