Шымкентте жүргізуші куәлігі жоқ азамат жол-көлік оқиғасын жасап, бір адам қаза тапқан. Сот оның кінәсін толық дәлелдеп, 2 жарым жылға бас бостандығынан айырды, деп хабарлайды BM.KZ.
Шымкент қаласының қылмыстық істер жөніндегі ауданаралық сотында жол апатына себепкер болған тұрғынға қатысты қылмыстық іс қаралды. Ол ҚР Қылмыстық кодексінің 345-бабының 3-бөлігі (көлік құралдарын басқаратын адамның жол жүрісі немесе көлік құралын пайдалану қағидаларын бұзу, яғни абайсызда адам өліміне әкеп соққан іс-әрекет) бойынша айыпталды.
Сот материалдарына сәйкес, 2025 жылдың сәуір айында айыпсалушы жүргізуші куәлігі болмағанына қарамастан, «Toyota Camry» автокөлігін басқарған көрінеді. Осы кезде Қасым-хан көшесінде жәбірленушінің көлігімен соқтығысып, жол-көлік оқиғасын тудырған. Апат салдарынан оның көлігіндегі жолаушы ауыр жарақат алып, ауруханада қайтыс болды. Тағы екі жолаушы түрлі дәрежедегі жарақат алған.
Сот, кінәні растайтын айғақтарды негізге ала отырып, айыпталушы Д.-ны ҚР ҚК-нің 345-бабының 3-бөлігі бойынша кінәлі деп таныды.
“Сотталушының тағылған айып бойынша кінәсі іс бойынша жинақталған құжаттармен дәлелденеді. Жаза тағайындау барысында сотталушының қылмыстық жауапкершілігін жеңілдететін мән-жайлар ретінде істеген іс-әрекетіне шынайы өкініш білдіруін, ауырлататын мән-жайлар іс бойынша анықталмады. Сот, Д.-ны ҚК-нің 345-бабының 3-бөлігімен кінәлі деп танылып, 5 жыл мерзімге көлік құралын жүргізу құқығынан айыра отырып, 2 жыл 6 ай мерзімге бас бостандығынан айыру жазасын тағайындады” — дейді Шымкент қаласының қылмыстық істер жөніндегі ауданаралық соты.
Сот үкімі заңды күшіне енген жоқ.