Шымкент. 25 шілде. BM.KZ. /Әсел Мәлік/ – Соңғы уақытта елімізде медицина қызметкерлеріне қарсы күш көрсету деректері қоғамда қызу талқыға түсіп жатыр. Қостанайда болған жан түршігерлік оқиғадан кейін Мемлекет басшысы мұндай әрекеттерге заң жүзінде қатаң тосқауыл қою қажет екенін айтып, нақты тапсырмалар берді, деп хабарлайды Ақорда.
Хабарламада Президенттің Үкіметке заңнаманы өзгерту бойынша тиісті түзетулер әзірлеуді жүктегені айтылған.
«Дәрігерлердің денсаулығына нұқсан келтіріп, өміріне қауіп төндіретін мұндай келеңсіздіктерге «Заң және тәртіп» қағидатына сәйкес құқықтық тұрғыда батыл түрде тосқауыл қойылуы керек», — делінген жазбада.
Осы жазбаға байланысты сарапшы мамандар пікір білдірді. «Денсаулық сақтау аналитиктері қауымдастығы» президенті Али Нұрқожаевтың айтуынша, еліміздегі медициналық ұйымдарда орын алатын жанжалдар мен күш көрсету оқиғаларына қатысты нақты статистика жоқ.
«Орын алған жайттар туралы нақты деректер жоқ. Сол себепті тиісті шаралар шілде айындағы жағдай сияқты тек жұртшылықтың назарын аударған оқиға болған кезде ғана қабылданады», — дейді сарапшы Али Нұрқожаев.
Али Нұрқожаевтың айтуынша, мұндай даулы мәселелер соңы татуласумен аяқталады. Себебі ақ халаттылардың заң қуып, сотта отыруға уақыты жоқ. Сондықтан да олардың құқығын қорғайтын арнайы мекеме болу керек деп санайды.
«Бұл ретте мына жайтты түсіну маңызды: қарапайым медицина қызметкерінің арыз жазуға, тергеу немесе сот істеріне қатысуға көбіне уақыты да, қаржысы да, моральдық ресурсы да жете бермейді. Сондықтан мұндай жағдайларда дауды заң аясында шешуге, құқықтық салдарға жеткізуге арналған арнайы құрылымдар – кәсіподақтар, мемлекеттік органдар және басқа да институттар бұл міндетті өз мойнына алуы тиіс. Қоғамда резонанс тудырған істер бойынша ашық сот процестері, айыпталушының отбасылық жағдайына немесе әлеуметтік мәртебесіне қарамастан, «медицина қызметкеріне қол көтердің бе – заң аясында нақты жазаланасың» деп қарау керек», — дейді сарапшы.
Сонымен қатар, ол дәрігерлерге қол көтерудің көбеюі зорлық-зомбылыққа қарсы қоғамдық иммунитеттің әлсіздігі екенін айтады.
Айта кетейік, шілде айында екі медициналық қызметкерге күш көрсету жағдайы әлеуметтік желіде тарады. Оның бірі Қостанайда болса, екіншісі Қарағандыда орын алды. Әсіресе қостанайлық дәрігер қатты соққы салдарынан есін жоғалтып, жансақтау бөліміне түскен. Қазір хирургтің жағдайы жақсарып келеді. Ал оны ұрған адам тергеу изоляторына қамалып, үстінен іс қозғалды.