Астана. 7 қараша. BM.KZ — АҚШ Президенті Дональд Трамп Қазақстанның Ибраһим келісіміне қосылуын әлем елдері арасында алтын көпір орнатудағы маңызды қадам деп бағалады.
— Қазір ғана Қазақстан Президенті Қасым-Жомарт Тоқаевпен бірге Израиль премьер-министрі Биньямин Нетаньяхумен телефон арқылы сөйлестім. Қазақстан менің екінші мерзімімде Ибраһим келісіміне қосылған бірінші елге айналды және бұл басы ғана. Бұл — бүкіл әлем бойынша алтын көпір орнатудағы алғашқы үлкен қадам. Бүгінде көптеген ел менің Авраам келісімім арқылы бейбітшілік пен өркендеуді қабылдауға ниет танытып отыр. Таяу уақытта мұны ресми жасау үшін қол қою рәсімі жайын жария етеміз және де көптеген ел осынау күш клубына қосылуға тырысып жатыр. Елдерді тұрақтылық пен өсім — нағыз прогресс, шынайы нәтиже үшін біріктіруде әлі де көп дүние істеу қажет, — деп жазды АҚШ Президенті.
Айта кетейік, Қазақстан Ибраһим келісіміне қосылды.
Бұл — АҚШ-тың қолдауымен Израиль, араб және мұсылман әлемі арасындағы ынтымақтастық алаңы ретінде Ибраһим келісімдерін жаңғыртуға бағытталған қадам
Америкалық Аxios басылымының хабарлауынша, Қазақстан мен Израиль 30 жылдан астам уақыттан бері дипломатиялық қарым-қатынастарды дамытып келеді. Алайда, жаңа келісім Вашингтонның бағалауынша, діни төзімділік пен өңіраралық диалогтың нышанына айналады.
Ақ үйдегілер Қазақстанның келісімге қосылуы Газа секторындағы соғыстан кейін Израильді халықаралық қолдауды қалпына келтіру бағытындағы алғашқы қадам болатынын айтады.
АҚШ шенеунігінің сөзінше, келісімге жаңа мұсылман мемлекеттерінің қосылуы Израильдің легитимділігін нығайтып, өңірдегі бейбітшілік пен ынтымақтастыққа жасалған жаңа қадам болады.
Израильдің БАӘ, Бахрейн және Мароккомен қарым-қатынасын жетілдіру жөніндегі келісім Трамптың бірінші президенттік қызметіндегі шешуші дипломатиялық жетістік болатын.
Енді Вашингтон өңірлік ынтымақтастық пен дінаралық өзірі түсіністікті дамытуға екпін түсіре отырып, бұл форматты кеңейтуді көздеп отыр.
Ақ үй Сауд Арабиясының Тақ мұрагері Мұхаммед бин Салманның 18 қарашада Вашингтонға жасайтын сапарының алдында Авраам келісіміне серпін бермек.
Майамидегі экономикалық конференцияда сөйлеген сөзінде Трамп Сауд Арабиясының АҚШ-тағы елшісі, Рима бинт Бандарға Эр-Риядты келісімге мүше елдердің қатарынан көргісі келетінін айтқан.