Астана. 22 қараша. BM.KZ — АҚШ президенті Дональд Трамп Украинаға американдық тарап ұсынған «бейбіт жоспарға» келесі бейсенбіге, 27 қарашаға дейін келісім беру үшін уақыт берді. бұл туралы DW жазды.
Бұл туралы ол 21 қараша, жұма күні Fox News телеарнасына берген сұхбатында айтты. 27 қарашада АҚШ-та «Алғыс айту» күні аталып өтеді және Трамптың пікірінше, бұл Ресеймен соғысты аяқтау туралы келісімге келу үшін ыңғайлы уақыт.
«Менде талай дедлайндар болды, бірақ егер бәрі жақсы жүрсе, олар әдетте ұзартылып жатады. Бірақ бейсенбі – біздің ойымызша, қолайлы мерзім», – деді ол.
Трамп сонымен қатар Украина бұл соғыста аумақтар мен адамдардан айырылып жатқанын атап өтті.
Бұған дейін Reuters және Washington Post басылымдары АҚШ билігінің Украина президенті Владимир Зеленскийді Ресеймен бейбіт келісім жасауға мәжбүрлеуге ниетті екенін хабарлаған. Егер Украина келіспесе, АҚШ қару-жарақ жеткізуді және украин әскеріне барлау ақпаратын беруді тоқтататынын ескерткен.
Трамптың «бейбіт жоспарына» пікір білдірген Зеленский, елдің өте күрделі таңдаудың алдында тұрғанын атап өтті:
«Не ар-намыстан айрылу, не басты серіктен айырылып қалу қаупі тұр. Не 28 тармақты қабылдау керек, не биылғы қыс ең ауыр болады және басқа да қиындықтарға тап боламыз», – деді ол 21 қарашада Украина халқына жолдаған үндеуінде.
Сонымен қатар, Зеленский АҚШ және басқа серіктестермен келіссөздер жүргізіп, Вашингтонның «бейбіт жоспарына» балама ұсыныстар енгізетінін мәлімдеді.