Астана. 30 қыркүйек. BM.KZ – YouTube бейнехостинг компаниясы АҚШ президенті Дональд Трамптың сотқа шағымын реттеу үшін 24,5 млн доллар төлеуге келісті. Оның аккаунты 2021 жылы Капитолийдегі тәртіпсіздіктерден кейін бұғатталған болатын. Шағым түсірілуінің себебі де сол, деп хабарлайды DW.
Келісім бойынша, төлемнің 22 млн доллары Ақ үйдің бал залын салумен айналысатын Trust for the National Mall қорына жіберіледі. Ал қалған 2,5 млн доллар басқа талапкерлерге – жазушы Наоми Вульф пен Америкалық консерваторлар одағына (American Conservative Union) бөлінеді.
Еске сала кетсек, 2021 жылы президент сайлауына наразылық білдірген Трамп жақтастары Капитолий ғимаратына басып кіргендіктен, оның Facebook, Instagram, YouTube және Twitter аккаунттары бұғатталған болатын. Әлеуметтік желі басшыларының пікірінше, саясаткердің жазбалары тәртіпсіздікті қолдады. Ал Трамп мұны заңсыз цензура деп бағалады.
Кейін 2022 жылдың соңында Илон Маск Twitter-ді (қазіргі X) сатып алғаннан кейін Трамптың парақшасын қайта ашты. 2023 жылдың ақпанында Meta, ал наурыз айында YouTube те оның аккаунттарын қалпына келтірді.
Бұған дейін Meta Platforms Трамппен дауды реттеу үшін 25 млн доллар, X компаниясы 10 млн доллар өтемақы төлеуге келіскен еді. Осылайша, Alphabet-ке тиесілі YouTube бұл мәселені шешкен үшінші ірі технологиялық компания болды.