Астана. 3 желтоқсан. BM.KZ — WBO және IBF тұжырымдары бойынша орта салмақтағы әлем чемпионы Жәнібек Әлімханұлы кезекті жекпе-жегі алдындағы допинг тестінен өтпей қалды.
Танымал Америкалық «The Ring magazine» кәсіпқой бокс басылымының хабарлауынша, Жәнібек Әлімханұлы VADA сынағынан кейін өнімділікті арттыратын дәріні қолданғаны туралы жағымсыз қорытынды шығарды.
Осылайша, осы сенбі күнге жоспарланған Жәнібек Әлімханұлы және Эрисланди Лара арасындағы орта салмақтағы WBO, IBF және WBA белбеулері үшін біріккен титулдық жекпе-жектің сәтті өтуіне үлкен қауіп төнді.
Жәнібек Әлімханұлы допинг дауына қатысты өз пікірін айтты.
Боксшы әрқашан таза спортты қолдайтынын, қайта анализ тапсыратынын айтты.
— Мен әрқашан таза спортты қолдаймын. Мұны жақсы білесіздер. Мен таза спортты насихаттап жүргенімді де білесіздер. Жаңалықты оқып таңғалып отырмын. VADA бірінші рет анализ алып, бәрі таза деп еді. Мен витаминдеріме де, тамағыма да ешқандай өзгеріс енгізбедім. Екінші рет тестте неге мұндай болғанын түсінбей отынмын, біз қайта анализ тапсыруға өтініш айттық. Жауабын күтіп отырмыз! — деді боксшы instagram парақшасында.
WBO ерікті допингке қарсы қауымдастықтан (VADA) талдау қорытындысы туралы ресми хабарлама алғанын растады.
— Ұйым ережелеріне сәйкес және адалдыққа, спортшылардың қауіпсіздігіне және әділ бәсекелестікке деген міндеттемемізді қайта растай отырып, WBO ішкі тергеу процесін бастайды. Спортшыларға және оның өкілдеріне толық құқықтар, тиісті рәсімдер және барлық тиісті ақпаратты, түсініктемелерді және құжаттаманы ұсыну мүмкіндігі берілетін «Себепті көрсету туралы хабарлама» жіберіледі, — делінген ресми мәлімдемеде.
WBO барлық қатысушыға допингке қарсы іс-шаралар қатаң жауапкершілік саясаты бойынша жүргізілетінін еске салды.
— Осы саясатқа сәйкес, егер спортшының сынамасында тыйым салынған зат табылса, WBO ниет, кінә, немқұрайлылық немесе қасақана пайдалануды дәлелдеуге міндетті емес. Тыйым салынған заттың оның денесіне енбеуін қамтамасыз ету спортшының міндеті болып саналады және спортшы анықталған кез келген тыйым салынған зат үшін толық жауапты болады, — деп атап өтті ұйым.
WBO бұл мәселе қазір белсенді тергеу үстінде болғандықтан және процестің тұтастығын сақтау үшін қазіргі уақытта ешқандай түсініктеме бермейтінін, барлық тарап WBO ережелеріне сәйкес кез келген шешімдер немесе әрекеттер туралы жазбаша түрде хабардар етілетінін мәлімдеді.
BoxingScene басылымының хабарлауынша, ерікті допингке қарсы қауымдастық (VADA) боксшының допинг сынамасынан тыйым салынған мельдоний дәрілік затын тапқан.
Айта кетерлігі, мельдоний Шығыс Еуропаның кейбір елдерінде рецепт бойынша берілетін дәрі болып саналады, бірақ Әлімханұлы бұл затты бұрын-соңды қолданғанын жоққа шығарғандықтан, бұл даулы мәселе болуы мүмкін.
Мельдоний 2016 жылы Дүниежүзілік допингке қарсы агенттіктің (WADA) жарыс кезінде де, жарыстан тыс уақытта да қолдануға тыйым салынған дәрілер тізіміне енгізілді. Себебі ол төзімділікті арттыру және оңалту мен қалпына келу процесін жеделдету үшін метаболизмді өзгерту қабілетіне байланысты.
Басылымның айтуынша, дәрілік заттарды тексеру кезіндегі барлық жағымсыз нәтижелерге қатысты стандарт сияқты, кінәлі тарап өзінің «В» үлгісін тексеруді талап етуге құқылы. Нәтиженің әртүрлі болуы өте сирек кездеседі. Дегенмен боксшылар күдікке іліккеннен кейін тесттен қайта сәтті өткен жағдайлар болған.